ҚҰРЫЛЫС ҚАРҚЫНЫ БӘСЕҢДЕМЕУІ ТИІС
Облыстық әкімдікте аймақ басшысы Даниал Ахметовтің төрағалығымен өңірдің әлеуметтік-экономикалық дамуы мәселесі бойынша кеңес өтті. Жиын барысында аймақтағы бірқатар салалар бойынша өзекті деген мәселелер қаралды.
Айта кету керек, көптеген көрсеткіштер бойынша, атап айтқанда, құрылыс, инвестициялар, агросектордағы жобалар бойынша ШҚО бүгінгі таңда жетекші орында тұр. Дегенмен де, өкінішке орай, бірқатар аудандарда және Алтай қаласында құрылыс қарқыны біршама төмендеген, оның себебін анықтау үшін облыс әкімі арнайы комиссия құруды тапсырды.
Облыс басшысының айтуынша, бүгінгі таңда Курчатов қаласында әлі күнге дейін бассейн жұмыс істемейді және бұл мәселені қала әкімі шешуі керек.
Жиында сондай-ақ әскерге шақырылушыларға арналған медициналық комиссиялардың жаңа форматын енгізу мүмкіндігі де талқыланды. Оларды аудандық ауруханаларда өткізуге болады, өйткені олар заманауи жабдықтармен жабдықталған және PACS жүйесіне қосылған.
Мұнымен қатар облыс әкімі Даниал Ахметов аудандар мен қалалар әкімдеріне көп балалы отбасыларға арналған тұрғын үй салу жобасын 100 шаршы метрге дейін ұлғайту жағын қайта қарауды да арнайы тапсырды. Жеке тұрғын үй құрылысы және жайылымдық жерлерге учаскелер бөлу мәселесі бақылауда тұр.
— Сонымен қатар дәрігерлерді тұрғын үймен қамтамасыз етуге ерекше назар аудару қажет. Қазір медициналық мамандардың тапшылығы Өскемен мен Семей қалаларында байқалады, — деді аймақ басшысы.
Жиын барысында айтылғандай, жергілікті атқарушы билік тарапынан тұрғындарға уақыты пен қаражатын үнемдеу мақсатында инженерлік инфрақұрылымы жүргізілген учаскелерді ұсыну қажет. Осы ретте құрылыс басқармасы жылу желілерінің жағдайын талдап, қуаттылықты қай жерде арттыру керектігін анықтауы керек.
Әсіресе қалалар әкімдері үй құрылысына тиімді учаскелерге бөлінген жобаларды уақыт оздырмай әзірлеуі тиіс. Өйткені құрылыс маусымы басталған кезде, яғни ағымдағы сәуір айы мен алдағы мамыр айында барлығы дайын болуы тиіс.
Сондай-ақ бос учаскелерді жеке тұрғын үй құрылысына пайдалану үшін не істеу керектігін шешу қажет. Аталмыш бағдарламаны іске асыру бойынша Семей, Зайсан және Аягөз қалалары жақсы көрсеткішке ие.
«Бір қабатты Шығысқа» барлық қалалар мен аудандар толықтай қатысуы керектігін аймақ басшысы жиі айтады, сол кезде ғана тұрғын үй мәселесі шешіледі. Ол үшін барлық елді мекендер бойынша ақпарат жинақталып, тұрғындар қолайлылығы үшін жер телімдерінде коммуникация желілері тартылуы шарт.
Азамат ЕРСАЙЫН,
«Семей таңы»
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
