ЗАУЫТ ҚАЙТА ІСКЕ ҚОСЫЛМАҚ
Облыс әкімі Даниал Ахметов апта сейсенбісінде аймағымыздағы іргелі өндіріс ошағы болған Серебрянск бейорганикалық өндірістер зауытын қалпына келтіру мәселесі бойынша кезекті кеңес өткізді.
Аймақ басшысы айтып өткендей, бұл тарапта қазірдің өзінде жақсы нәтижелерге қол жеткізілген. Атап айтқанда, 1500 бірлік жабдықтың 1150-і жұмысқа жарамды және зауытты іске қосу үшін тек жұмсақ шатырды жөндеу қажет. Бұл үшін облыстық мәслихаттың маусым айында өтетін сессиясы барысында қаражат бөлінетін болды.
Айта кетерлік тағы бір қуанышты жаңалық – қазіргі таңда зауыт бұйымдарын жеткізуге 25 кәсіпорынмен шарттар жасалған. Өнімнің жеті түрі біздің облысымыздағы ірі өндірістік компаниялардың талаптарына сәйкес келеді және қазір олардың ұзақ мерзімді қолдауына жүгіну өте маңызды.
— Өнеркәсіптік алыптар отандық өндіруші ретінде өндіріс орнын қолдауға дайын. Біз ШҚО мен Қазақстанның тұтыну нарығын қосымша зерттейміз. Сондай-ақ зауытқа оның одан әрі дамуына қаражат салуға дайын инвесторлардың қызығушылық танытуы маңызды, — деп атап өтті облыс әкімі Даниал Ахметов.
Динара НҰРЛЫБЕКҚЫЗЫ,
«Семей таңы»
