ДАЛА ЖҰМЫСТАРЫНА ДАЙЫНДЫҚ ПЫСЫҚТАЛДЫ
Семей қаласы әкімдігінде өткен жиында көктемгі дала жұмыстарына дайындық барысы қаралды.
Жиында ауыл шаруашылығы бөлімінің басшысы Нұрлан Ошақбаев баяндама жасады. Оның айтуынша, барлық дақылдар бойынша егістікке қажетті тұқымның толық көлемі дайындалған.
— 2022 жылға егіс алқаптарының алдын ала құрылымы 17001 гектарды құрайды. Биылғы жылы көктемгі дала жұмыстарына 63 ауыл шаруашылығы тауарын өндірушілер, 13403 гектар, жеке қосалқы шаруашылықтар, 1876 гектар, және саяжай алаптары, 1722 гектар, қатысады,- деді бөлім басшысы.
Шаруа қожалықтары ауыл шаруашылығы дақылдарын егу алаңдарын пысықтады.
Негізгі басымдық әлеуметтік маңызы бар азық-түлік тауарларының тізбесіне енген картоп пен көкөніс өнімдерін егуге беріледі. Ауыл шаруашылығы дақылдарының түрлері бойынша егіс алқаптарының жоспарланған құрылымына тоқталсақ, дәнді дақылдар — 1277 гектар алқапта (40 га күздік дақылдарды есепке ала отырып) 2 есеге артық; майлы дақылдар — 2350 гектар (39,3 %-ға артық); картоп — 3800 га (5,6 % артық); көкөніс дақылдары — 1496,9 гектар (2,5 %-ға артық); бақша дақылдары — 55,1 га (2,7 %-ға артық); мал азығы дақылдары — 8022 гектар (96 %-ға артық).
650 тонна арзандатылған дизель отыны литріне 212 теңгеден бөлінген, оның ішінде сәуір айына 260 тонна, мамыр айына 260 тонна, маусым айына 130 тонна. «Sati oil» ЖШС оператор болып белгіленді.
— Бүгінгі күні 140 тонна дәнді дақылдар қажет, дәнді дақылдармен 100 пайыз қамтамасыз етілген, 14,5 тонна майлы дақылдар қажет, қазір 13,5 тонна бар, жетіспейтін көлемі сатылып алынуда. Картоп тұқымының 80%-ы ауыл шаруашылығы тауар өндірушілерінің қоймаларында сақталған, қалған көлеміне келісімшарттар жасалған. Көкөніс және бақша дақылдары Голландия мен Ресейден жеткізіледі,- деп атап өтті ауыл шаруашылығы бөлімінің басшысы Нұрлан Ошақбаев.
Ауыл шаруашылығы бөлімінің басшысы мал азығы дақылдары – жоңышқа, эспарцет, судан шөбі, сүрлемдік жүгері және басқа да тұқымдардың жеткілікті екенін айтты.
Биыл пайдаланылмайтын суармалы егістік жерлерін айналымға енгізу арқылы суармалы жерлер көлемі 1500 гектарға ұлғайтылыпты.
Суармалы жерлер көлемінің 13759,1 гектары 53 шаруа қожалығына бекітілген, соның ішінде биылғы жылы 44 қожалық 11361,5 гектар жерді пайдаланады. Бұл егістік аумақтарды 13 қожалық жаңбырлату әдісімен, 7 қожалық тамшылатып суару әдісімен, 17 қожалық арық әдісімен, қалған 16 қожалық табиғи жолмен суарады.
Қала әкімі Бақытжан Байахметов басқа да дақылдардың өндірісін ұлғайту қажеттігін атап өтті.
– Бізде майлы дақылдар бойынша өсім 139 пайыз. Біз үшін қазір көкөністер маңызды. Өкінішке орай, мұнда өсім баяу – 102,5 пайыз. Бұл мәселені шешу керек, бұл өте маңызды,– деді әкім.
Азамат ЕРСАЙЫН,
«Семей таңы»
