Конституцияға енгізілетін өзгерістерді түсіндіру мақсатында Семейге келген «Хабар «Агенттігі» АҚ Басқарма төрағасы, AMANAT партиясы республикалық штабының мүшесі Берік Уәли қаламыздағы студенттермен және оқытушылармен кездесті.
Берік Уәли жиынға қатысушыларды аймағымыздың облыстық мәртебе алуымен құттықтап, қаламыз жайлы өз әсерін бөлісті.
— Баршаңызды облыс мәртебесінің қайтарылуымен және ұлы жерлесіміздің есімін алған жаңа облыстың құрылуымен құттықтаймын! Бұл — керемет жаңалық. 2019 жылы Семейде болғанда Мемлекет басшысы қаланы еліміздің тарихи және рухани астанасы деп жариялады. Мен Қасым-Жомарт Тоқаевпен үш жыл жұмыс істедім, оның барлық қалаларды дамытуға қаншалықты мән беретінін білемін, – деді Берік Уәли.
«Хабар «Агенттігінің» Басқарма төрағасы конституциялық реформалар, елдің саяси-әлеуметтік өмірін түбегейлі өзгертетін ауқымды оқиға — референдум жайлы пікірін айтты.
— Елімізде саяси реформалар жасайтын уақыт жетті, әсіресе қаңтар оқиғасы түбегейлі өзгерістер жасайтын уақыттың жеткенін көрсетіп берді. Реформаларда осы Ата Заңға енгізілетін өзгерістер қамтылған. Біз өзгерістерді Ата Заңымыздан бастауымыз керек. Өйткені Конституция – мемлекеттің негізгі заңы. Мемлекеттік басқару тетігі Конституция негізінде жұмыс істейді. Сондықтан рефендумға барлығымыздың қатысқанымыз өте маңызды, қабылданатын шешімге әркім жауапты болуы тиіс, өйткені ол біздің болашағымызға тікелей әсер етеді, — деп атап өтті Берік Уәли.
Берік Уәли өзінің жоспарлары туралы да айтып өтті. Қазіргі күні ол өзінің Баспасөз хатшысы ретіндегі жұмысы жайлы кітап жазып жатқанын айтты.
AMANAT партиясы республикалық штабының мүшесі студенттер мен оқытушылардың референдумға қатысты ой-пікірлерін тыңдап, қойған сұрақтарына жауап берді.
Анар АХМЕТҚАЛИЕВА,
«Семей таңы»
