Семей қаласының әкімі Бақытжан Байахметов Шығыс кентіне барып, Аюченко көшесіндегі жөндеу жұмыстарының барысымен танысты.
Айта кетейік, өткен жылы Усть-Каменогорская көшесі бойындағы негізгі магистральға көлік кептелісін азайту және өткізу қабілетін арттыру мақсатында осы көшені Шайжүнісов көшесінен 6-Линия көшесіне дейін кеңейту жобасы әзірленген болатын. Жолдың ұзындығы 2 шақырым, жобалық фирма – «Жаңа Жол» ЖШС.
Үстіміздегі жылдың мамыр айының басында аталған жоба жүзеге асырыла басталды. Көшенің батпақты бөлігі арқылы айналма жол салу және оны нығайту жұмыстары қолға алынды (Наркологиялық диспансерден Аюченко және Көшкінбаев көшелеріне дейін). Асфальт төселіп, айналма жол толық дайын болғаннан кейін Усть-Каменогорская көшесінің негізгі бағыты бойынша жолдар жабылады.
Жоба 2 жылға есептелген, алайда мердігер жұмысты қысқа мерзімде — ағымдағы жылдың қазан айының соңына дейін орындауға тырысатынын айтады.
Негізгі көшені жапқан кезде Усть-Каменогорская көшесінің қозғалысы Абай көшесінен Ғ.Тоқай көшесіне бағытталады. Автокөлік қозғалысындағы осы өзгерістер туралы қаланың қоғамдық көлік қатынасында қызмет көрсететін тасымалдаушылар хабардар етіледі.
Қала әкімдігі Шығыс кенті тұрғындары мен кәсіпкерлерін жөндеу жұмыстары кезіндегі уақытша қолайсыздықтарға түсіністікпен қарап, шыдамдылық танытуды сұрайды.
Жұмыстар аяқталған кезде Семей қалалық полиция басқармасымен келісілген жол жұмыстарының белгілері және автомобиль көлігінің қозғалысын шектеу белгілері орнатылады.
Семей қаласы әкімінің баспасөз қызметі