Апта ішінде Семей қаласының әкімі Шаған кентінің тұрғындарымен кездесу өткізді. Жиын басында Бақытжан Байахметов Шаған ауылының тұрғындарын Семейдің әлеуметтік-экономикалық дамуымен және алдағы жоспарлармен таныстырды.
Шаған кенті облыстық маңыздағы Семей – Курчатов автожолы бойында орналасқан. Кентте 550 адам тұрады.
Соңғы 3 жылда округті дамытуға 52,7 млн теңге бағытталды. Әкімдік ғимаратын ағымдағы жөндеуден өтті. Бұрын әкімдік шағын жеке үйде орналасқан болатын. Енді бұрынғы темір жол станциясының ғимаратына көшті. Сонымен қатар қаражат су құбыры желілерінің құрылысына жобалық-сметалық құжаттама әзірлеуге жұмсалды. Кент орталықтандырылған сумен жабдықталмаған. Жобалық-сметалық құжаттама 2021 жылы әзірленді. Сараптама қорытындысы ағымдағы жылдың 30 тамызында дайын болады деп болжанып отыр.
Биыл мұнда балалар ойын алаңы орнатылып, жүзден астам бала өз уақыттарын тиімді өткізуде. Сонымен қатар кенттің ересек тұрғындарының бос уақытын да тиімді өткізулеріне жағдай жасау мақсатында спорт алаңы да орнатылады. Жұмыстар шілде айының соңында басталады.
ТҮКШ бөлімі көшені жарықтандыруға жобалық-сметалық құжаттама әзірлеуде. Кенттегі негізгі көшені жарықтандыру жұмыстарын жүргізуге жақын күндері өткізуге конкурс жариялау жоспарланып отыр.
Клубқа ағымдағы жөндеу жұмыстары жүргізіліп жатыр. Ол бұрынғы мектеп ғимаратында орналасатын болады. Қазіргі уақытта әрлеу жұмыстары аяқталды, содан кейін едені мен төбесі ретке келтіріледі. Мұнда балаларға арналған түрлі үйірмелер ашу жоспарлануда.
— Жалпы, округтің 2025 жылға дейінгі даму перспективасына 665,1 млн теңге бөлу жоспарланып отыр. Бұл қаражат саябақ аумағын абаттандыруға, су құбыры желілерін салуға, Стационная көшесінің аумағын абаттандыруға бағытталатын болады, — деді қала әкімі.
Өткен кездесуде тұрғындар ұялы байланыстың нашарлығына шағымданған болатын. Кентте (мектепте, әкімдікте, медициналық пунктте) «Транстелеком» АҚ интернеті тартылды, Beeline ұялы байланысы 2G мобильді интернетке қол жеткізу технологиясымен жүргізілді. 69 абонент «Транстелеком»АҚ АДСЛ арнасы бойынша интернет желісіне қосылған. 2021 жылдың желтоқсанында «Аltel» операторының қосалқы байланыс тірегі орнатылды. Ағымдағы жылдың соңына қарай BEELINE ұялы операторының қосалқы тірегін орнату жоспарлануда.
Тұрғындар азық-түлік қымбатшылығы мәселесін шешуді сұраған болатын. Мониторингтік топ әлеуметтік маңызы бар өнімдердің бағасын тұрақтандыру үшін дүкендерді үнемі тексереді. Кент кәсіпкерлері тауар құнын сатып алу бағасынан 15%-дан артық көтермейді. Мәселе тұрақты бақылауда.
Кент тұрғындары сондай-ақ мектеп пен спорт залын салу мәселесін қарастыруды сұраған болатын. Шаған кентінде №24 ЖББМ бар. Мектеп шағын, 1970 жылы салынған ғимаратта орналасқан. Жобалық қуаты 100 орын. 1-9 сыныптарда 54 оқушы оқиды. Мектепте ауданы 50,4 шаршы метр болатын спорт залы бар. Сыныптарда бала саны аз. Соңғы 3 жылда: 2019 жылы – 9, 2020 жылы – 6, 2021 жылы – 4 сәби дүниеге келген. Тұрғындарға бала туу көрсеткішінің төмендігі мен 0 жастан 16 жасқа дейінгі балалар санының аздығына байланысты, мектеп пен спорт залдың құрылысы әзірге мүмкін еместігі айтылды.
Кенттің жекелеген тұрғындары мектептегі тамақтану сапасын бақылауға қатысты наразылықтарын жеткізді. 2020 жылдан бастап кенттегі мектепте Курчатов қаласынан әкелінетін буфеттік тамақтану ұйымдастырылды. Ағымдағы оқу жылында мектепте тамақтандыруды ұйымдастыру бойынша конкурс аяқталды.
Тұрғындар қатымхана құрылысы мәселесін шешуге де көмек сұраған еді. Бұл мәселеде жергілікті кәсіпкер Ғалиев Сайлаубек көмекке келді. Ол бір кездері мешіт салған. Енді мешітті жөндеуден өткізіп, екіге бөлу арқылы (мешітке және қатымханаға) қайта жаңғыртуға ниет білдірді. Қазіргі уақытта кент тұрғындарының күшімен мешітті қайта құру жұмыстары жүргізілуде.
Кездесуде қала әкімі тұрғындардың сұрақтарына жауап берді. Бақылаусыз мал жаю мәселесі де көтерілді. Бақытжан Байахметов жергілікті әкімге және учаскелік инспекторға тұрғындар арасында түсіндіру жұмыстарын жүргізіп, мал жаю жұмыстарын ретке келтіруді тапсырды.
Тұрғындар жайылымдық жерлердің және шөп шабуға арналған учаскелердің жетіспейтінін де айтты. Олардың айтуынша, бос жерлер бар. Кент әкіміне қалалық жер қатынастары бөлімімен бірлесіп, он күндік мерзімде жер телімдеріне тағы да түгендеу жүргізіп, ұсыныстар дайындау тапсырылды.
Тағы бір мәселе – мал жаюға дайын жұмысшыға тұрғын үй жоқ. Кентте тегін үй бар, оны жөндеуден кейін тұрғын үй үшін беруге болады. Сондықтан қала әкімі үйді ретке келтіру мәселесін қарастыруды тапсырды.
Сонымен қатар Бақытжан Байахметов жергілікті фельдшер Рымгүл Ысқақованы медицина қызметкері күнімен құттықтап, жұмысына табыс және отбасына амандық тілей отырып, құрмет грамотасын тапсырды.
Бақытжан Байахметов Шаған кентінен кейін Жиенәлі ауылдық округіне барды.
Округтің Бөкенші және Маралды ауылдарында 800-ден астам адам тұрады.
Соңғы 3 жылда округті дамытуға 65,5 млн теңге бағытталды. Бөкенші ауылында шағын футбол алаңы орнатылып, Абай, Школьная, Сәтбаев көшелеріне сыртқы жарықтандыру орнатылды. Сондай-ақ Маралды ауылында блокты-модульді станция орнатылып, Бөкенші орта мектебіне ағымдағы жөндеу жұмыстары жүргізілді.
Ауыл жастары мен балаларына сапалы білім беру үшін Бөкенші орта мектебіне физика кабинеті сатып алынды. Жабдық жеткізілді, қазір орнатылу үстінде.
Бұл күндері Маралды ауылына балалар ойын алаңы орнатылуда. Жұмыстың аяқталу мерзімі осы айдың соңына дейін деп күтілуде.
Тұрғын үй-коммуналдық шаруашылығы бөлімімен Бөкенші ауылындағы көше жарығын орнатуға жобалық-сметалық құжаттама әзірленуде.
Жалпы, 2025 жылға дейін Жиенәліні кешенді дамыту аясында 38,4 млн теңге бөлу жоспарланған. Қаражат Бөкенші ауылындағы Қашаубаев, Момышұлы, Жамбыл, Сейфуллин, Әуезов, Уәлиханов, Степная, Арқа көшелерін сыртқы жарықтандыру құрылысына бағытталатын болады. Жоба «Ауыл — Ел бесігі» бағдарламасы бойынша 2023-2024 жылдарға арналған.
Бұл жобалардың барлығы жергілікті тұрғындардың өтініштеріне жауап ретінде іске асырылды.
Қала әкімінің округ тұрғындарымен өткен кездесулердің қорытындысы бойынша барлығы алты мәселе айтылды. Олардың екеуі шешілді, тағы үш мәселе қаралуда.
— Тұрғындардың тілектерінің бір бөлігі заңдағы шектеулерге байланысты әлі шешім таба алмайды. Мысалы, жергілікті мектепке балаларды тасымалдау үшін газель көлігі қажет. Бұл мәселе облыстық бюджеттің құзыретінде. Абай облысы енді ғана пайда болды, бұл мәселені болашақта шешуге болады. Жалпы, уақыт өте келе барлық мәселелерді біртіндеп шешуге болатынын сенімдімін, — деді қала басшысы.
Бөкенші тұрғыны Болатбек Қадыров мал жаю үшін жер учаскелерінің жетіспейтінін айтты. Оның айтуынша, бұрын үлкен жер учаскелері көрші ауылдың аумағына көшкен. Сондай-ақ тұрғындар ірі шаруа қожалықтары қоршау қоймағандықтан мал олардың аумағына кіріп кетеді деп шағымданды. Нәтижесінде мал шығарылмайды. Жанжал туындаған жағдайлар да болған.
Бұл мәселелер бойынша қалалық әкімдіктің жер қатынастары бөлімінің мамандары осында келіп, түсіндіру жұмыстарын жүргізді. Егістік жер иелерінің қатысуымен тыңдау өткізілді. Олар өз иеліктерінің шекарасында «электронды бақташы» орнатады деген келісімге қол жеткізілді.
Шынында да, егістік жерлерге арналған көптеген учаскелер бар. Кәсіпкерлерге басқа жерлерде жер учаскелерін беру арқылы мәселенің ауырлығын төмендетудің жолдары бар. Оның орнына олар өз учаскелерін жергілікті тұрғындардың қажеттіліктеріне беруі керек. Мысалы, жергілікті «КХ Ерлан» кәсіпкерлік иесі, егер оған басқа жерде учаске ұсынылса, Бөкенші тұрғындарына өз телімдерін (400 гектардан астам) беруге дайын.
Жергілікті әкімдіктің мәліметі бойынша, басқа бос жерлер бар, бірақ олар алыс немесе су жоқ.
Мәселені шешу үшін ӘКК мүмкіндіктерін де пайдалануға болады.
Барлық осы мәселелер мұқият талқылауды қажет етеді. Бақытжан Байахметов жер қатынастары бөліміне жағдайға жан-жақты талдау жүргізуді және 15 күн ішінде аралық ұсыныстар әзірлеуді тапсырды. Әкімнің келесі есеп беру кездесуіне дейін бұл мәселе өз шешімін табуы тиіс.
Кездесуде Маралды тұрғындары жергілікті тұрғын Бауыржан Қалиевтың демеушілік қаражаты есебінен орнатылған 12 жарықтандыру бағанасын іске қосуды сұрады. Бақытжан Байахметов округ әкімдігіне қалаға барып, «БЭСК» АҚ-мен келісім жасап, жарықтандыруды қосуды тапсырды.
Кездесу соңында Бақытжан Байахметов Бөкенші ауылының дәрігерлік амбулаториясының меңгерушісі Жүзбаева Айдынгүл Тілеубайқызын төл мерекесіне орай алғыс хатпен марапаттады.
Анар АХМЕТҚАЛИЕВА,
«Семей таңы»
