Семейге аспалы көпірді егжей-тегжейлі тексеру үшін шетелдік мамандар келді.
Қала әкімі Бақытжан Байахметов аспалы көпірді жөндеу мәселесі жөнінде Қазақстандағы «ITOCHU Corporation» және «IHI Infrastructure System Co, Ltd» компанияларының өкілдерімен кездесті. Олар аспалы көпірге егжей-тегжейлі сараптама жүргізуге ниетті. Тексеру нәтижелері бойынша қорытынды беріліп, соның негізінде көпірді жөндеу бойынша жобалық-сметалық құжаттама әзірленбек.
Ертіс өзені арқылы өтетін аспалы автожол көпірін жапондық «IHI Corporation» компаниясы салғаны белгілі. Жобаны іске асыруға сондай-ақ түріктің «Аларко Алсим» компаниясы қатысқан болатын. Көпір 2001 жылы пайдалануға берілді. Көпір пилондарының биіктігі — 98,5 метр, ұзындығы – 1086 метр (750 метрі – аспалы бөлігі) және іргелес жолдардың ұзындығы 14,5 шақырымды құрайды. Бес инфрақұрылымдық жол өтпесі, үш жер асты өткелі және көпір астындағы демалыс аймағы бар.
Жоба Қазақстан Республикасы мен Жапония үкіметі арасында қол қойылған шартқа сәйкес қаржыландырылды.
Көпірдің салынуы ескі көпірді, ел ішіндегі жолдарды, халықаралық жолдарды, соның ішінде Ресейдің Омбы — Новосибирск тас жолы жүктемесін жеңілдетуге мүмкіндік берді. Алайда құрылыс аяқталғаннан кейін көпірге қызмет көрсетілмеді, бұл жол жабынының айтарлықтай нашарлауына әкелді. Техникалық қызмет көрсету және пайдалану үшін қаржыландырудың жеткіліксіздігі, білікті мамандардың болмауы жол төсемінің бұзылуына, металл конструкцияларының коррозиясына, лифтілердің, электр жабдықтары мен электр желілерінің бұзылуына алып келді.
«ITOCHU Corporation» және «IHI Infrastructure System Co, Ltd» компаниясының мамандары орталық тас жолдың сыртқы жабынын кесу жұмыстарын бастауға ниетті. Көпірдің жалпы жағдайын анықтау үшін оның алты түрлі бөлігі ашылады. Бұл жұмыстар екі ай ішінде аяқталады деп күтілуде. Алынған үлгілер зертханалық зерттеулер үшін Жапонияға жіберіледі.
Сондай-ақ тозу мен коррозияға механикалық және химиялық тексеру жүргізу үшін кабель үлгілері алынады. Олардың да нәтижелері шамамен екі ай ішінде белгілі болады.
Компания өкілдері үлгілерді алу көпірдегі қозғалыс қауіпсіздігіне әсер етпейтіндігін атап өтті. Олар су, шаң мен құм қосылмай, жаңадан ауыстырылатын болады.
Жалпы, асфальт жабыны мен кабельдің жағдайын тексеру жұмыстары жыл соңына дейін жалғасады. Осыдан кейін ғана жұмыс көлемін және олардың күрделілігін анықтауға болады.
Алдын ала болжам бойынша, жыл соңына дейін жобалауды бастауға болады.
— Көпірді жөндеуді кім жобалайтын болады — бұл да маңызды. Егер бұл шетелдік компания болса, онда жобаның жергілікті жағдайларға бейімделуін және жұмыс қорытындылары қазақстандық заңнамамен байланыстырылуын ескеру қажет. Біздің, қазақстандық мамандардың қорытындысы міндетті түрде болуы тиіс, — деді Семей қаласының әкімі.
Бақытжан Байахметов, қажет болған жағдайда, жергілікті ерекшеліктерді ескере отырып түзетулер енгізу үшін шетелдік делегацияның жұмыс барысымен аралық танысуы маңызды екенін атап өтті.
Жобалауға кем дегенде алты ай қажет болады деп күтілуде. Қаржыландыру мәселесі келесі жылдың соңында немесе 2024 жылы шешілетін болады. Содан кейін жобаның қай бөлігін жапон тарапы, ал қайсысын қазақстандық тарап қаржыландыратыны туралы шешім қабылданады.
Айта кету керек, көпірді тексеру жұмыстары тегін жүргізіледі: өткен жылдың соңында Жапония Үкіметінің Жер, инфрақұрылым, көлік және туризм министрлігі аспалы көпірді тиісті қалпына келтіру бойынша техникалық-экономикалық негіздеме үшін қаражат бөлді. Әлемдегі жапондық компаниялар салған барлық көпірлердің жағдайын бақылау және қажет болған жағдайда одан әрі қолдау көрсету Күншығыс елінің саясаты екенін атап өту қажет.
«СТ» — ақпарат
