Семейде жылуға дебиторлық берешекті қайтару үшін борышкерлермен жұмыстар жүргізілуде. Бүгінде қалада 80 нысан жылу көзінен ажыратылған. Бұл нысандар қарызды толық төлегенге дейін жылуға қосылмайды. Бұл туралы 2022-2023 жылғы жылу беру маусымына дайындық және дебиторлық қарыз мәселесі талқыланған баспасөз конференциясында айтылды.
Семейде қазіргі күні заңды және жеке тұлғалар мен басқа да ұйымдардың «Теплокоммунэнерго» МКК алдындағы жалпы дебиторлық берешегі 666 млн теңгені құрап отыр, оның ішінде қала тұрғындарының қарызы 107 млн теңге болса, заңды тұлғалардың берешегі — 132 млн теңге.
Семейде 18 жылу көзі, оның ішінде 17 қазандық және «Теплокоммунэнерго» МКК ЖЭО-1 мекемелер мен тұрғын үйлерді жылумен қамтамасыз етеді. 76 орталық жылу пункттері бар, жылу желілерінің ұзындығы 2 құбырмен есептегенде 315,5 шақырымды құрайды.
— Қазіргі уақытта қалада дебиторлық берешекті қайтару бойынша жұмыстар жүргізілуде. Қарызды толық төлегенге дейін 80 нысан жылумен қамтамасыз етуден ажыратылды. Ескерте кететін жайт, қарыздар үшін мекемелердің шоттары бұғатталған, борышкерлерге елден кетуге тыйым салынады, сондай-ақ ерекше жағдайларда қарызын төлеуден жалтарғандар 15 күнге қамауға алынады, — дейді «Теплокоммунэнерго» МКК директорының міндетін атқарушы Аржан Кельменбетов.
«Теплокоммунэнерго» МКК-нің техникалық директоры Николай Дёмин Ресей мен Украина арасындағы жағдайға байланысты жылу көздері мен жылу желілерінде бірқатар жөндеу жұмыстары жүргізілмегенін айтты.
— Алдағы жылдың жылыту маусымына көмірге қажеттілік 484 906,7 тоннаны құрайды. 2021 жылы «Теплокоммунэнерго» кәсіпорны тамыздан бастап көмір жеткізілімін жауапты сақтауға қабылдады. 1 тамыздан бастап көмірді қабылдауға дайын болады. Ресей мен Украина арасындағы жағдайға байланысты ақша бағамы тұрақсыз болып тұр, қажетті материалдарды сатып алуда қиындықтар болды, сондықтан жылу көздері мен жылу желілерінде жөндеу жұмыстары толыққанды жүргізілмеді, — дейді «Теплокоммунэнерго» МКК-нің техникалық директоры.
Техникалық директордың орынбасары қала орталығындағы жылу беру нысандары арасындағы бөгетті жөндеуге қаржы бөлінгенін айтты.
— Бюджет қаражаты есебінен 14 жылу қазандығын жөндеуге 630 млн теңге бөлінді. Қазандықтарды, жылытқыштарды, экономайзерлерді, жылу желілерін ауыстыру көзделіп отыр. Бұл жұмыстар жылумен қамтуды тиімді жүзеге асыруға мүмкіндік береді, — дейді Николай Дёмин.
Баспасөз мәслихатында сондай-ақ қаладағы кейбір көп қабатты үйлерде әлі де басқару органдары жоқ екені айтылды. Бұл тұрғын үйлерге алдағы күзде жылу беруде кері әсерін тигізбей қоймайды.
— Басқару органдары жоқ үйлердің мәселесі де өзекті. Мұндай үйлердің саны 300-ден асады. Жылыту маусымына дайындық жұмыстарын бұл тұрғын үйлердің иелері өздері жүргізуге тиіс. Жылыту маусымы басталғанда дайын емес үйлерде қиындықтар туындап, олар жылуға ең соңынан қосылатын болады, — деп ескертті Николай Демин.
Дана ТАЛҒАТБЕК,
«Семей таңы»
