ШҚО әкімі Даниал Ахметовтің төрағалығымен өткен облыс әкімдігінің кезекті мәжілісінде туризм саласындағы мәселелер жан-жақты талқыланды.
Бүгінгі таңда Катонқарағай ауданындағы экологиялық және ауылдық туризмді дамытудың болшағы зор, онда жалпы ұзындығы 680 шақырым болатын 14 туристік маршрут пен соқпақтар шоғырланған (оның ішінде атпен – 333, жаяу – 247, автокөлікпен – 100 шақырым).
Облыс әкімінің тапсырмасы бойынша ауданда ауылдық туризмді дамыту бағытында жұмыстар жүргізілуде. Бұл жөнінде Катонқарағай ауданының әкімі Ділдар Қалиқанның ақпаратында айтылды.
– Кәсіпкерлер палатасымен бірлесіп, Берел ауылының 24 тұрғынына кәсіпкерлік негіздерін оқыту шарасы ұйымдастырылды. 18 жеке кәсіпкер тіркелді, оның 15-і «Еңбек» бағдарламасы бойынша 583 мың теңгеден грант алды (жалпы сомасы – 8,7 млн теңге). 1 жобаға «БЖК – 2025» бағдарламасы бойынша 5 млн теңге грант берілді (ЖК Алтай pro Орлов в.). Бұдан бөлек, «Катонқарағай ауданының тұрақты дамуы» қоғамдық қоры әрбір кәсіпкерге 500,0 мың теңгеден (жалпы сомасы – 9 млн теңге) гранттар берді. Аталған қаражатқа кәсіпкерлер ағымдағы жөндеу жұмыстарын жүргізіп, жиһаздарды жаңартты, атпен серуендеуді ұйымдастыру үшін жылқылар сатып алды, – деді аудан әкімі.
Аудан биылғы жылдың маусым айынан бастап алғашқы туристерді қабылдай бастаған. Үлкен Нарын ауылында туристік-ақпараттық орталық құру бойынша жоба іске асырылуда, ол өзіндік туристік хабқа – 10 тұрақты жұмыс орнын құра отырып, жергілікті туристік өнімдер туралы ақпарат беру жөніндегі сервистік қызметке айналмақ. Орталық ағымдағы жылдың желтоқсан айында ашылады деп жоспарланып отыр.
Сонымен қатар 12 млрд теңге қаржыға 20 ірі инвестициялық жоба іске асырылуда. Жоба аясында Катонқарағай ауданының Өрел ауылында 1,5 млрд теңгеге 150 төсек-орындық «Мұзтау» туристік кешені ашылған.
Жиын барысында күн тәртібіндегі өзекті тақырыпқа қатысты жазғы және қысқы маусымдардағы туристік орындары мол Алтай ауданы әкімінің міндетін атқарушы Сергей Охременко, Риддер қаласы әкімінің міндетін атқарушы Дархан Қосантаев өз аумақтарында туризмді дамыту бағытында атқарылған жұмыстар туралы ақпарат берді. Олардың сөзінше, барлық бағыттар бойынша жұмыс жалғасуда және тұрақты бақылауда.
– Шығыс Қазақстанда туризм саласын дамытуда дұрыс жұмыс атқарылып жатыр. Алайда әлі де дамыта түсу қажет. Оған мүмкіндік мол. Мысалы, Катонқарағай ауданында 15 кәсіпкер грант алды дедік. Олардың ауданға қандай, қанша пайда әкелгенін есептеген адам бар ма? Егер тағы талаптанушылар болса, олардың санын отызға дейін жеткізуге болады. Берел қорғанына туристер тартуды, Катонқарағай ауылындағы жартылай бос тұрған аурухананы Шығыс медицинасымен емдейтін орталыққа айналдыруды дұрыстап әрі тездетіп ойластыру керек. Сондай-ақ Самар ауданының Сарыбел ауылының жанындағы құмды жағажайды да үлкен демалыс орнына айналдыруға болады. Ол жердегі құрылыстарды бейберекет салғыза бермей, бір типтес, көрікті демалыс үйлерін салдыруды бақылау қажет. Алдағы уақытта ол жерден жер учаскесін беру жағын да бақылап, неғұрлым әлеуетті, қолынан іс келетін кәсіпкерлерге ұсыну қажет. Марқакөлдің, Риддердің, Алтай ауданының көрікті орындары туризмді дамытуға өзі-ақ сұранып тұр. Міне, осының бәрі тиісті басқарманың аталған аудандар мен қала әкімдерінің алда бірлесіп атқаратын жұмысы. Туризмді дамыту үнемі бақылауда болатын маңызды сала, – деп түйіндеді сөзін ШҚО әкімі Даниал Ахметов.
Ерлан АЙҚЫНҰЛЫ,
«Семей таңы»
