Елімізде Мемлекет басшысы Қ.К.Тоқаевтың тапсырмалары және Халықтың табысын арттырудың 2025 жылға дейінгі бағдарламасының кешенді жоспары аясында AMANAT партиясының жанындағы жобалық кеңсенің «Ауыл аманаты» жобасы іске асырылуда.
Ерлан АЙҚЫНҰЛЫ,
«Семей таңы»
Еске сала кетейік, аталған жобаның негізгі мақсаты – ауыл шаруашылығы тауарын өндірушілерді жан-жақты қолдау, ауыл тұрғындарын аграрлық бизнеске барынша тарту, азық-түлік қауіпсіздігі және азаматтардың өмір сүру сапасын жақсартуға байланысты мәселелерді шешу. Жобаның шарттары – халыққа 2,5% мөлшерлемесінде несие беру арқылы ауылдық округтегі кәсіпкерлікті кешенді түрде дамыту және оларға қызмет көрсететін сервистік-дайындау кооперативін құру.
«Ауыл аманаты» жобасының өкілдері тамыз айынан бастап Шығыс Қазақстан облысының шалғай ауылдарына барып, ауыл тұрғындары арасында ақпараттық-түсіндіру жұмыстарын жүргізеді.
Жақында олар Ұлан ауданына қарасты Бозанбай және Тарғын ауылдарында болды.
— Бозанбай және Тарғын ауылдарының тұрғындарымен кездестік. «Ауыл аманаты» жобасына қатысты тұрғындар тарапынан қойылған сұрақтардың басым бөлігі 2,5% мөлшерлемесінде несие алу үшін кепілдікке қойылатын жылжымайтын мүлікке байланысты және шағын кооперация құру туралы болды. Жалпы, жобаның негізгі мақсатын жан-жақты талдап түсіндірген кезде тұрғындар қызығушылық танытып, өздерінің ұсыныстарын айтып, ойларында жүрген идеяларымен бөлісуде, — дейді «Ауыл аманаты» жобасы бойынша бизнес-тренер Жұмагүл Мақашева.
Еске сала кетейік, жобаның бірінші бөлігінде Президент Қ.К.Тоқаевтың биылғы жылдың 11 қаңтарында ҚР Парламенті Мәжілісінің отырысында берген тапсырмаларын орындау және Қазақстан Республикасы Үкіметінің 2022 жылғы 14 сәуірдегі № 218 қаулысымен бекітілген Халықтың табысын арттырудың 2025 жылға дейінгі бағдарламасын іске асыру мақсатында AMANAT партиясының Саяси менеджмент академиясы өткен шілде айының 11-20 күндері аралығында ауыл және ауылдық округ әкімдерін оқытуды ұйымдастырды.
Оқуға Шығыс Қазақстан және Абай облысы бойынша 240 ауылдық округтің әкімдері қатысты.
