Қала әкімдігі жанындағы терроризмге қарсы комиссияның кезекті отырысы өтті. Қала басшысы Айбек Кәрімовтің төрағалығымен өткен жиында екі мәселе талқыланды. Біріншісі, аталмыш комиссияның 2014 жылғы 12-ші наурызда өткен отырысының хаттамалық шешімінің орындалуына, екіншісі, жастар арасында, сондай—ақ, жоғары, орта арнайы және орта оқу орындарында діни экстремизм мен терроризмнің тарау проблемаларына қатысты болды.
Бірінші мәселе бойынша қала әкімі аппаратының құқық қорғау органдарымен жұмыс бөлімінің бас маманы Қанат Қабдуллин баяндама жасады. 2014 жылғы наурыздың 12-сі күні өткен отырысқа осы мәжілісте есеп беруге тиіс болған терроризмге қарсы комиссия мүшелерінің кейбірі дайындыққа немқұрайлы қарағандары үшін ескерту алған көрінеді. Сондай-ақ, сол жиында қабылданған шешімге сәйкес, облыстық Әділет басқармасы басшысының атына хат жазылып, оның тарапынан көрсетілген лауазымды тұлғалар қатаң ескертілгені туралы жауап алынған.
Комиссия отырысының күн тәртібінде қаралған жастар арасында, сондай-ақ, жоғары, орта арнайы және орта оқу орындарында діни экстремизм мен терроризмнің таралу мәселесіне қатысты бірінші болып Семей қаласы ІІБ экстремизмге қарсы күрес жөніндегі бөлімінің басшысы Жанат Малаев ақпарат берді. Өз сөзінде ол жастар арасындағы экстремизмнің алдын алудың негізгі құралы болып білім беру жүйесі табылатынын тілге тиек етті. Алдын алу шаралары жастардың жас мөлшері мен өмір сүріп отырған әлеуметтік жағдайларын есепке ала отырып жүргізілуі керек екендігін де атап өтті.
— Экстремисттік белсенділіктің ықпалына ең жиі ұшырайтын 14-22 жас аралығындағы жастар. Өйткені, дәл осы жас аралығында әртүрлі себептерге байланысты радикалды көзқарастардың қалыптасу ықтималдығы жоғары. Бұл орайда, экстремизмнің алдын алу үшін нәсілдік және діни өшпенділіктің көріністерін анықтау бағытында қаламыздағы оқу орын- дарындағы әлеуметтік хал-ахуалға мониторинг жүргізілуі қажет. Қандай да бір келеңсіз жайттарды анықтаған жағдайда құқық қорғау органдарына хабарлау керек, — деп атап өтті Жанат Сыдықұлы.
Сондай-ақ, ол шетелде білім алып жатқан қала тұрғындарының санына байланысты мониторинг жүргізу, қаладағы оқу орындарының оқытушылар құрамымен жастар арасында экстремистік көзқарастардың алдын алу бойын- ша ортақ шараларды қалыптастыру үшін арнайы түсіндіру жұмыстарын жүргізу керек деген ойын да ортаға салды. Қалалық ішкі істер басқармасы қызметкерлерінің дін өкілдерімен бірлесе отырып, жыл басынан бері 19 жедел алдын алу шараларын өткізгенін айта келе, қала аумағында жастар арасында экстремистік ұстанымдарды насихаттайтын ұйымдардың жоқтығы анықталғанын айтты. Оның үстіне бұл бағыттағы жұмыстар қатаң бақылауға алынған көрінеді.
{jcomments on}Жастар арасында экстремизмнің алдын алу бойынша Ішкі істер басқармасы тарапынан атқарылып жатқан шаралар туралы ақпарат тыңдалғаннан кейін қала әкімі Айбек Кәрімов осыған қатысты өзінің пікірін білдірді.
— Экстремистік ұйымдардың ықпалына ең жиі ұшырайтын 14-22 жас аралығындағы жастардың саны қанша екенін білу қажет. Бұл өз кезегінде жүргізілетін алдын алу шараларының тиімділігін арттыруға мүмкіндік береді, — деді Айбек Мүталапханұлы.
Жиында жастар арасында экстремизмге қарсы күрес шаралары туралы Семей қалалық ішкі саясат бөлімінің басшысы Ғалия Смайылованың да баяндамасы тыңдалды. Өз сөзінде ол ішкі саяси тұрақтылық пен ұлтаралық, дінаралық келісімді одан ары нығайта түсу бағытында барлық шаралар атқарылып жатқанына тоқталды. Бұл орайда жастар арасында экстремизмнің алдын алу мақсатында дін өкілдері мен біліктілігі жоғары мемлекеттік қызметкерлерден, зиялы қауым өкілдерінен құралған арнайы ақпараттық-насихат тобының жұмысын да атап өтті.
— Ақпараттық-насихат тобының жұмысын ұйымдастыру барысында жаңа Қазақстандық патриотизмнің қалыптасуына, жастарға рухани-адамгершілік тәрбие беру мәселелеріне көп көңіл бөлінеді. Себебі, жастар қоршаған ортадағы оқиғаларды өткір қабылдайтындықтан және ерекше әлеуметтік сипаттарына байланысты теріс пиғылды ұйымдардың ықпалына тез ұшырайды. Бұл орайда экстремизмнің алдын алу бағытындағы жұмыс қоғамдық маңызы бар шараларды өткізу арқылы жүзеге асырылып жатыр. Оның ішінде діни мерекелерді бірге атап өту өте кең қолданылуда. Ағымдағы жылдың алғашқы бес айында қала бойынша 17 524 адамның қатысуымен барлығы 59 шара өткізілген, — деді Ғалия Жақыпқызы. Өз сөзінде ол ағымдағы жылдың 18-ші мамыр күні Абыралы өңірінде шалғайда жатқан бес ауылдық округтің тұрғындарымен кездесу өткізілгенін жеткізді. Қыр-күйек айында екі күндік арнайы семинар өткізу жоспарланып отырған көрінеді.
Жиында қаламызда диструктивті ұйымдардың әреке-тінен зардап шеккен азаматтарға көмек көрсетумен айналысатын арнайы ұйым құру мәселесі көтерілді. Ғалия Жақыпқызы бұл мәселенің өзекті екенін айта келе, оны шешу үшін қаражат бөлу қажеттігін айтты. Бұл орайда Айбек Мүталапханұлы ұсыныстың дер кезінде жасалып отырғанын атап өтіп, оны жүзеге асыру үшін қажетті жұмыстар орындалатынын жеткізді.
Отырыста жастар арасында экстремизмнің алдын алу бойынша өз саласында атқарылып жатқан шаралар жайында білім бөлімінің басшысы Гүлжан Алтынбекова да ақпарат берді. Ол өз сөзінде бұл бағытта қала мектептерінде көптеген шаралар өткізілгеніне тоқталды. Оқушылар арасында экстремистік көзқарастардың қалыптасуының алдын алу жұмыстары да бақылауға алынған екен. Сондай-ақ, Гүлжан Қайырханқызы мектеп бітірген жастардың қандай оқу орындарына оқуға түскені, оқуын тәмамдағаннан кейін қандай жұмыс істеп жатқаны туралы ақпарат жиналатынын жеткізді. Оның айтуынша, қалыптасқан арнайы база жастардың әлеуметтік жағдайын бақылауда ұстауға, сол арқылы діни экстремизмнің алдын алуға септігін тигізетін көрінеді.
Жиын соңында қала әкімі Айбек Кәрімов экстремизмнің алдын алу өте маңызды мәселе болып табылатынына тағы бір тоқталып өтті. Бұл бағытта барлық мемлекеттік және құқық қорғау органдары тығыз байланыс орнатып, жұмыла жұмыс істеу керектігін айтты. Сондай-ақ, қала басшысы экстремизмнің алдын алуда кешенді түрде жұмыс жасауды жалғастыру қажеттігін де атап өтті.
Мирас ҚҰСАЙЫН,
«Семей таңы»
