Қостанай облысындағы алапат өрт бүкіл ел тұрғындар бей-жай қалдырмауда. Қазір әр өңір өрттен зардап шеккендерге гуманитарлық көмек көрсете бастады. Бұл игі іске семейліктер де ат салысып жатыр.
Қостанай облысының Әулиекөл ауданындағы алапат өртті сөндіру үшін Семей қаласынан арнайы инженерлік техникалар мен әскерилер жіберілді. Қарулы күштердің арнайы инженерлік техникасы Семей қаласынан Қостанай облысына өртті жою үшін жексенбі күні шұғыл түрде көмекке аттанды.
Сонымен қатар, Абай облысы аумағандағы «AMANAT» партиясының филиалдарында 9 гуманитарлық көмек қабылдау пунктілері де ашылды. Қазіргі күндері онда жергілікті жұртшылықтан, әсіресе кәсіпкерлер мен еңбек ұжымдарынан қостанайлықтар үшін киім-кешектер мен материалдық жабдықтар, тұрмыстық бұйымдар, медициналық препараттар, төсек-орын жабдықтары, және азық-түлік түріндегі көмек қабылдануда. Осы орайда Қостанай облысы Әулиекөл ауданындағы күрделі өрт жағдайынан бірнеше елді мекендерден тұрғындарды эвакуациялауға байланысты «AMANAT» партиясының Абай облыстық филиалы өрттен жапа шеккен тұрғындарға көмек көрсету жөнінде аймақ жұртшылығына арнайы үндеу жариялаған болатын.
Жақынына жәрдем көрсетіп, қайыр-берекесімен танылған Абай елі, ежелден өзіне тән жомарттығымен, қиындыққа душар болған отандастарымыздың рухын көтеріп, моральдық және материалдық көмек қолын созуда. Бұл ретте Семей қаласы бойынша қабылдау пункті шаһардағы Шәйжүнісов көшесі, 138 үй мекен-жайында орналасқан.
-Қостанай облысы Әулиекөл ауданындағы жағдай барлықтарыңызға белгілі. Үлкен өрт салдарынан үйлер өртке оранып, бір ауылдың халқы баспаныз қалып отыр. Бұл барлық қазақстандықтарды алаңдатып отырған жағдай. Сондықтан партиямыздың бастамасымен 4 қыркүйек күні сағ 9-дан бастап филиалымызда барлық өңірлерден гуманитарлық көмек қабылдауды ұйымдастырдық. Әркім өз мүмкіндігіне қарай көмек көрсете алатынын айтып, гуманитарлық көмек көрсетуге шақыру үшін Абай облысымыздың халқына үндеу жарияладық. Қарапайым адамдар, кәсіпкерлер, қол ұшын созғысы келгендер жан-жақтан хабарласуда. Облыстағы аудандармен байланыстамыз, партияның филиалдары жұмыс жасауда. Қостанай облысы бізден өте қашық болғандықтан өңірлерден көмек көрсетушілер шот сұратып, қаржылай көмек көрсетуде, — дейді Абай облысындағы «AMANAT» партиясы филиалының атқарушы хатшысы Қайрат Қаханұлы.
Еске салсақ, 2 қыркүйекте сағат 15:10-да Қостанай облысындағы Қазанбасы ауылынан 20 шақырым жерде, «Басаман КШШ» КММ аумағында орман алқабы өртенген болатын. Өрт ауылдарға қарай жалындап, тұрғындар эвакуацияланды, өртке байланысты шұғыл желі іске қосылды. Аталмыш облыста төтенше жағдай жарияланды.
Сонымен қатар, Президент Қасым-Жомарт Тоқаев апта дүйсенбісінде Қостанай облысында болып, өрт алған аумақты тікұшақпен әуеден бақылады. Өртті сөндіру жұмыстарына назар аударып, бірқатар шұғыл шаралар қабылдады.
Төтенше жағдайлар министрлігінің мәліметі бойынша, Қостанай облысы Әулиекөл ауданындағы өрт 43 мың гектардан астам аумақты шарпыған. Аманқарағай ауылында 98 үй өртеніп кетті. 10 адамды орташа деңгейде күйік шалған және уланған. Өкінішке орай өрт алған елді мекендерде адам шығыны да бар.
Қазіргі таңда еліміздің барлық өңірлерінде «AMANAT» партиясының ұйымдастыруымен гуманитарлық көмек қабылдау пунктілері жұмысын бастады.
Дана ТАЛҒАТБЕКҚЫЗЫ,
«Семей таңы».
