Өткен аптада Самар ауданы Құлынжон ауылының шағын жинақты мектебінде «Ybyrai mektebi» атты жіксіз оқытудың пилоттық моделі іске қосылды. Аталған шараға Құлынжон мектебінің түлегі, «Ybyrai mektebi» жобасының демеушісі, BI-Group холдингінің акционері және директорлар кеңесінің төрағасы Айдын Рахымбаев, Қазақстан Республикасы Ы.Алтынсарин атындағы Ұлттық ғылым академиясының вице-президенті Әлия Чокушева, ШҚО білім басқармасы «Шығыс» өңірлік орталығының директорының міндетін атқарушы Гүлмира Джакупова, Самар ауданының әкімі Раджан Сейтқанов, Самар аудандық білім бөлімінің қызметкерлері қатысты.
Зарина КӘП,
«Семей таңы»
«Ybyrai mektebi» жобасы Құлынжон мектебінің түлегі Айдын Рахымбаевтың бастамасымен «Aidyn & Anar Rakhimbayev Foundation» қорының қаражатымен жүзеге асырылуда.
Салтанатты шарада «Құлынжон ауылы мектебінің директоры Аралбек Берікұлы «Ybyrai mektebi» тұжырымдамасымен таныстырды.
Ауыл мектебінде орталықты қайта құру, күрделі жөндеу және жаңа коммуналдық орталықтың құрылысы бойынша жұмыстар жүргізіліп, барлық қажетті заманауи жабдықтармен жабдықталған. Бұл — 1 жастан 5 жасқа дейінгі балаларға арналған бөбекжай, бастауыш мектеп, орта және жоғары мектеп, сондай-ақ ауылдың барлық тұрғындары үшін комьюнити орталығы бар бір үлкен кешен.
Соңғы үлгідегі технологиямен жабдықталған жаңа форматтағы бұл мектепте білім алу — Самар өңіріндегі барлық балалардың арманы. Көрші ауылдардың да балалары осында келіп оқиды екен.
Жоба негізін қалаушылардың айтуынша, бұл модель үздіксіз оқу үдерісін, балалардың балабақшадан бастауыш мектепке және одан кейінгі кезеңге күйзеліссіз өтуін және одан әрі оқытудың бірыңғай тәсілін қамтиды.
Кешеннің маңызды бөлімдерінің бірі – мәдениет үйі, оның жұмысында бала — мұғалім — ата-ана, яғни үш жақты байланыстың болуы міндетті.
«Ybyrai mektebi» кешенінің жобасы ауыл мектебінің түлегі Айдын Рахымбаевтың бастамасымен «Айдын және Анар Рахымбаевтар» қорының қаражатымен жүзеге асырылуда. Жобаға салынған инвестиция көлемі 2 миллион долларды құрайды.
Орталықтың базасында робототехника және 3D модельдеу, қолданбалы өнер, театр өнері және вокал, бейнелеу өнері үйірмелері, кинотеатр, сондай-ақ баскетбол, волейбол, шағын футбол, күрес, шахмат және тоғызқұмалақ секциялары жұмыс істейді.
Мектеп директоры Аралбек Берікұлының айтуынша, қазіргі күні мектепте 190 бала білім алуда. Алматы мен Астана қалаларынан Мичиган мемлекеттік университетінде білім алған мұғалімдер сабақ береді. Алдағы уақытта оқушыларға математика пәні сингапурлық әдіс бойынша оқытылатын болады. Оқушылар үй тапсырмасын бірден мектепте орындайды. Балалардың сапалы білім алуы үшін барлық жағдай жасалған.
Құлынжон ауылындағы бұл мектеп республикалық тәжірибе алаңы мәртебесін алғанын айта кеткен де жөн. Бұл – ауыл мектебі үшін үлкен жетістік.
