Сәрсенбі, 5 қазан күні Абай облысы мәслихатының кезектен тыс, VIII сессиясы өтті. Сессия жұмысына облыс әкімінің орынбасары Айдын Кәрімов, Республикалық бюджеттің атқарылуын бақылау жөніндегі есеп комитетінің мүшесі Нұрлан Нұржанов, облыстық басқармалар басшылары, мемлекеттік және құқық қорғау органдары мен БАҚ өкілдері қатысты.
Сессияның күн тәртібінде Абай облысы бойынша тексеру комиссиясының төрағасы мен мүшелерін тағайындау; облыстық терроризмге қарсы комиссиясының дербес құрамын бекіту; ауыл шаруашылығы жануарларын жаю; үй жануарларын ұстаудың және серуендетудің қағидаларын бекіту туралы төрт мәселе қаралды. Облыстық мәслихат шешімімен Абай облысы тексеру комиссиясының төрағасы лауазымына Нариман Таушов тағайындалды. Нариман Бақытұлы Батыс Қазақстан ауыл шаруашылығы институтын ауылшаруашылық өндірісінің қаржыгер- -ұйымдастырушысы мамандығы бойынша, М.Өтемісұлы атындағы Батыс Қазақстан мемлекеттік университетінің құқықтану мамандығы бойынша бітірген. Ұзақ жылдар салық заңнамасында қызмет етіп, Батыс Қазақстан, Маңғыстау, Атырау облыстарының салық департаменттерін басқарған. Мемлекеттік аудит және қаржылық бақылау саласында тәжірибесі мол Нариман Таушов бұған дейін Атырау облысы бойынша тексеру комиссиясының төрағасы, 2021-2022 жылдары Атырау облысы әкімінің орынбасары қызметтерін атқарды. Сессияда облыста ауыл шаруашылығы жануарларын жаю қағидалары бекітілді. Қағидаларға сәйкес, ауыл шаруашылығы жануарларын жаюды ұйымдастыру, жаю кезінде айдауды ұйымдастыру, айдауға жататын жануарларды іріктеу нормалары, сондай-ақ жануарларын жаюды жүзеге асыратын бір адамға арналған жүктеме нормалары қарастырылған. Облыста ауыл шаруашылығы жануарларын жаю қағидалары жобасымен ауыл шаруашылығы және жер қатынастары басқармасының басшысы Анзор Абаев таныстырды. — Абай облысында ауыл шаруашылығы жануарларын жаю тәртібін айқындайтын қағидалар «Агроөнеркәсіптік кешенді және ауылдық аумақтарды дамытуды мемлекеттік реттеу туралы» және ҚР Ауыл шаруашылығы министрінің «Ауыл шаруашылығы жануарларын жаюдың үлгілік қағидаларын бекіту туралы» бұйрығына сәйкес әзірленді. Қағидалардың жобасы облыстық Қоғамдық кеңеспен алдын ала келісілді, сыбайлас жемқорлыққа қарсы сараптаманың, облыстың кәсіпкерлер палатасының қорытындылары алынып, «электрондық үкімет» порталында қоғамдық тыңдаулар өткізілді, қағидаларды әзірлеу кезінде барлық ескертулер мен ұсыныстар ескерілді,- деді Анзор Мициевич. Қағидаға сәйкес, ауруға шалдыққан ауыл шаруашылығы жануарларын жаюға, ауыл шаруашылығы жануарларын жалпыға ортақ пайдаланылатын жерлерде, темір және автомобиль жолдарына бөлінген белдеулерде, су қорғау белдеулері мен санитарлық қорғау аймақтарының шекарасында жаюға; су қорғау аймақтарының шегінде жүктелім нормасынан асырып мал жаюға, сондай- -ақ қоғамдық орындарда, шомылу орындарында, тоғандарда, субұрқақтарда, су айдындарында және жалпы пайдаланымдағы су қабылдағыштарда ауыл шаруашылығы жануарларын суаруға, бірдейлендірілмеген ауыл шаруашылығы жануарларын жаюға; мал иелерінің немесе олар уәкілеттік берген адамдардың қадағалауынсыз жаю орнына дейін және кері айдап апаруға, жаюға жол берілмейді. — Ауыл шаруашылығы жануарларын жаю қағидаларын бұзу ҚР заңнамасына сәйкес жауапкершілікке әкеп соғады. Айыппұл мөлшері әкімшілік құқық бұзушылық туралы Кодекспен реттеледі, − деді Ауыл шаруашылығы және жер қатынастары басқармасының басшысы. Депутаттар тарапынан құқық бұзушыларға қатысты айыппұл көлемін ұлғайтуды және бақылаусыз жайылып жүрген малдың әр басы үшін иелеріне айыппұл салу туралы ұсыныс айтылды. Қараусыз жайылған малдардың жол апаттарына себеп болып жатқан жағдайлар да аз емес. — Біз желілік полиция бөлімімен және теміржолшылармен жол қауіпсіздігіне қатысты бірнеше кездесу өткіздік. Қараусыз жүрген малды біз айыппұл тұрағына апарамыз. Бірақ айыппұл тұрақтарын ұйымдастырудың тәртібі жоқ. Бұл — алдағы уақытта қолға алынатын шаралар, — деді Анзор Абаев. Депутаттар малды түгелдей есепке алу туралы талаптар енгізуді ұсынды. Олардың айтуынша, қараусыз жайылған мал жол апатына себеп болса, тағылған белгі арқылы мал иесін оңай анықтап, жауапкершілікке тартуға болады. Ауыл шаруашылығы және жер қатынастары бөлімі басшысы қолға алынып жатқан тағы бір жаңашылдық туралы айтты. Яғни темір жолдың жайылымдарға жақын жатқан бөліктерінде «электрондық шопандар» немесе арнайы тосқауылдар орнату ұсынылуда. — Бұл малдың жол бойына шығып кетпеуі үшін қажет, яғни қауіпсіздік шараларының бірі. Бұл мәселені қазір пысықтап жатырмыз, түсіндіру жұмыстары жүргізілуде,− деді басқарма басшысы. Басқарма басшысы айтылған ұсыныстар тиісті ведомстволарға жіберілетінін жеткізді. Сессияда сонымен қатар үй жануарларын ұстаудың және серуендетудің қағидаларын бекіту туралы Абай облысының ветеринария басқармасының басшысы Ержан Барышев, облыс әкімдігі жанындағы терроризмге қарсы комиссиясының дербес құрамын бекіту туралы облыс әкімінің аппарат басшысы Жасұлан Сәрсебаев айтып өтті. Сессияда қаралған барлық мәселелер бойынша тиісті шешімдер қабылданды.
Дана ТАЛҒАТБЕК,
«Семей таңы»
