«Ұлылар мекеніне саяхат». Биыл маусым айының 25-28 аралығында өткізілген шара осылай аталады. Астана төрінен бастау алған саяхат жылдағы дәстүр бойынша Семей қаласында өз мәресіне жетті.
«Ұлылар мекеніне саяхат» Астана қаласындағы Абайтану ғылыми-танымдық орталығының ұйымдастыруымен осымен үшінші рет өткізіліп отыр. Ұйымдастырылған үш жылдың ішінде шараға 130-ға жуық адам қатысқан көрінеді. Биыл да саяхатқа қатысуға ниет білдіргендердің арасында еліміздің түкпір-түкпірінен келген ақындар, жазушылар, ғалымдар, журналистер мен Абай оқуларының жеңімпазы атанған оқушылар бар. Тағы бір айта кетерлік жайт, осы жолғы саяхат жылдағыдай 2 күнге емес қатысушылардың сұрауы бойынша 3 күнге созылды. Абайтану ғылыми-танымдық орталығының жетекшісі Алмахан Мұхаметқалиқызы шараның мақсаты жайлы былай дейді:
— «Абайтану» пәні мектеп бағдарламасына енгізілгенімен, бүгінге дейін арнайы оқулық қалыптаспай келе жатыр. Осы саяхатты өткізу арқылы осы мәселенің шешілуіне септессек пе деген ойымыз бар. Тағы бір үлкен мақсатымыз — Абай елін таныстыра отырып, артымыздан келе жатқан ұрпақтың руханиятқа көзін ашу. Елін, жерін, өлкесін, тілін, отанын сүюге тәрбие-леу. Сондай-ақ, Қазақстан бойынша әдеби-мәдени экскурсиялық саяхаттарды өткізу ісін жолға қойсақ деп ниеттенудеміз. «Мәңгілік Ел» боламыз десек, алдағы уақытта тек қана осы ұлылар мекеніне ғана емес, еліміздің киелі жерлеріне дәл осындай саяхаттар ұйымдастыруымыз керек. Себебі, мұндай бастамалар жас ұрпақтың бойына руханиятты сіңіруге үлкен септігін тигізбек.
{jcomments on}Саяхат Астанадан басталып, Павлодар облысында жалғасып, Семей қаласында аяқталды. Нақтырақ айтқанда, жылдағы дәстүр бойынша Абайдың қорық-мұражайында мәресіне жетті. Ұйымдастырушылардың айтуынша, саяхат барысында Семейге дейінгі жерлердің тарихы, табиғаты, атақты тұлғалары жайлы жан-жақты ақпарат берілген көрінеді. Ал, Абай жолы арқылы Жидебайға барғандағы сапарларында одан кейін Абай мұражайында өткен экскурсия барысында қатысушылар Ұлы хакімнің шығармашылығы, өмірі, туған-туыстары жайлы мағ-лұматтармен танысу мүмкіндігіне ие болды. Кейбір мәліметтерді естіген кезде саяхатшылар өздерінің таңданыстарын жасырмады.
— Жалпы, жас ерекшеліктеріне қарамай осындай саяхат- тарға қатысу арқылы көп білім алады. Хакім Абайдың бұрын өзі естісе де толық ұғынбаған қырлары жайлы тұщымды мәліметтерден хабардар болып, тереңірек түсінуге мүмкіндік болды. Менің өзім, саяхатқа қатысу барысында, тіпті, осыған қалыптасқан ойымның ұшқары екенін байқап, хакімнің қалдырған мұрасына ерекше бір көзқараспен қарай бастадым. Егер, менің жасымдағы адамға осылай әсер етсе, бұл сапардың жастарға тигізетін ықпалы қандай болатынын ойлай беріңіз. Сондықтан «Ұлылар мекеніне саяхат» сияқты шаралардың азаматтарымызды, әсіресе, өскелең ұрпақты рухани тұрғыда тәрбиелеуде тигізер көмегі көп деп ойлаймын,- дейді филососфия ғылымдарының кандидаты Серік Әмірғазин.
«Ұлылар мекеніне саяхат» аясында өткізілген экскурсиядан кейінгі арнайы басқосу барысында шараға қатысушылар, Абай мұражайының басшылығы мен қызметкерлері Хакім Абайдың шығармашылығы жайлы ойларын ортаға салып, оны дәріптеу, ұрпақтарға жеткізу тұрғысында ұсыныстарымен бөлісті.
Мирас ҚҰСАЙЫН, «Семей таңы»
