Семей қаласының жаңа әкімі өз жұмысын аға ұрпақ өкілдерімен кездесуден бастады. Кездесу барысында Нұрбол Нұрсағатов ардагерлермен бірге қаланың негізгі проблемалық мәселелерін, соның ішінде абаттандыру, көгалдандыру, жолдарды, су құбыры жүйелерін жөндеу, қоқыс шығару, қоғамдық көлік қозғалысы және тағы басқа мәселелерді талқылады.
— Сіздердің арқаларыңызда үлкен өмірлік және кәсіби тәжірибе бар. Сондықтан мен үшін сіздердің пікірлеріңіз маңызды, мен сіздердің өтініштеріңізді мұқият тыңдауға дайынмын. Әкімдік барлық тілектер мен сындарлы ұсыныстарды қарастырады, — деді Нұрбол Нұрсағатов аға буын өкілдеріне.
Облыс ардагерлер кеңесінің төрағасы Мұрат Алин Абай облысының 90 мың ардагері атынан Нұрбол Нұрсағатовты Семей қаласының әкімі лауазымына тағайындалуымен құттықтады. Ол ардагерлер қаланы жақсартуға белсенді қатысуға және Семей қаласының маңызды әлеуметтік-экономикалық мәселелерін шешуде тірек болуға дайын екенін, Семейді көркейтіп, оны қайтадан гүлденген қалаға айналдыратын уақыт келгенін атап өтті.
Нұрбол Нұрсағатов қала әкімдігінің басшылығымен проблемалық мәселелерді кезең-кезеңімен шешетінін айтты. Жақын арада семейліктерге облыс орталығын дамытудың барлық бағыттары бойынша жұмыс жоспары ұсынылатын болады.
Кездесу соңында ақсақалдар жаңадан тағайындалған әкімге жылы лебіздерін білдірді.
Семей қаласы әкімдігінің баспасөз қызметі
