Бұл жайында ҚР сауда және интеграция бірінші вице-министрі Арман Шаққалиев Абай облысына кел- ген сапарында айтты. Жұмыс сапары аясында Арман Шаққалиев Абай облысы әкімінің бірінші орынбасары Айдын Кәрімовпен бірге аймағымыздағы картоп, сәбіз, пияз, қызылша және қырыққабат өсіруде көшбасшы болып отырған «Агрофирма «Приречное» серіктестігіне, одан соң «Ақшын» базарына барып, өңірдегі сауда мен ауыл шаруашылығының даму барысымен танысты.
Дана ТАЛҒАТБЕК,
«Семей таңы»
Агрофирма «Приречное» ЖШСде ауыл шаруашылығы техникасы жеткілікті, суару жүйесі және 14 мың тоннаға арналған көкөніс қоймасы бар. Ауыл шаруашылығы кәсіпорны жыл сайын 7-9 мың тонна картоп, 2 мың тонна сәбіз, қырыққабат және пияз өндіреді. Көкөністерді сақтайтын қоймалар бар, олар маусымаралық кезеңде облыстағы бағаның тұрақты деңгейін қамтамасыз етуге мүмкіндік беріп отыр. Бірінші вице-министр сондай- -ақ 2 148 сауда орнына есептелген «Ақшың» базарының жұмысымен танысты. Нысанның жалпы ауданы 19 мың шаршы метрді құрайды. Орталықта ветеринарлық, лабораториялық орын ашылған. Азықтүліктің барлығы сараптамадан өтіп, тексеріліп отырады. Бірінші вице-министр сонымен қатар Әлихан Бөкейхан университетінде жұртшылықпен және бизнес өкілдерімен кездесті. Кездесуге аймақ кәсіпкерлері мен ауыл шаруашылығы тауарын өндірушілер, сондай-ақ қоғамдық кеңестер мен азаматтық сектор өкілдері қатысты. Жиынға қатысушылар министрлік өкілдеріне әлеуметтік маңызы бар азық-түлік тауарларының бағасын қалыптастыру, азық-түліктің қолжетімділігін қамтамасыз ету және кәсіпкерлік субъектілері үшін мемлекеттік қолдау шаралары және т.б. мәселелер төңірегінде сұрақтарын қойды. Вице-министр қазіргі уақытта министрлік негізгі әлеуметтік тауар өндірушілермен белгіленген бағаны қамтамасыз ету үшін қажетті көмекті талқылау бойынша жұмыс жүргізіп жатқандығын атап өтті. Сондай-ақ қант өндірушілермен меморандум жасалғанын, картоп өндірушілермен де жұмыс пысықталып жатқанын айтты. Арман Шаққалиевтың айтуынша, Абай облысындағы супермаркеттер, ауладағы дүкендер иелерімен, өндірушілермен әлеуметтік өнімдерге сауда үстемесін 10 пайыздан арттырмау туралы 336 меморандумға қол қойылған — Өздеріңіз білетіндей, бірінші жарты жылдықта қант тапшылығы мәселесіне тап болдық. Қант – импортқа тәуелділігі жоғары әлеуметтік өнімдердің бірі. Алдағы уақытта мұндай жағдайлардың алдын алу үшін Үкімет жедел шаралар қабылдауды жоспарлап отыр. Қант бағасын тұрақтандыру бойынша шаралар 2026 жылға дейінгі қант өнеркәсібін дамытудың кешенді жоспарына енгізілген. Бұл шаралардың қатарында қант қызылшасын өсіру алаңдарын ұлғайту және тұрғындарды қантпен жеткілікті мөлшерде қамтамасыз ету үшін отандық зауыттарды жаңғырту жұмыстары бар, — деді Арман Абайұлы. Бірінші вице-министр қазір Үкіметте ауыл шаруашылығы тауарын өндірушілерді ерте кезеңде қаржыландыру міндеті тұрғанын атап өтті. Бұл үшін «айналым» схемалары бойынша қаржыландыру бөлу тетіктері өзгертілуде. Тауар өндірушілер өз кезегінде шикізат пен өнімді төмен бағамен сатып ала алады. Бұл әсіресе маусымаралық кезеңде негізгі азық-түлік тауарлары бағасының күрт өсуіне жол бермейді. Арман Шаққалиевтың айтуынша, енді тұрақтандыру қорлары басқа форматта жұмыс істейтін болады. — Әлеуметтік маңызы бар тауарларға келетін болсақ, мұнда бірқатар тәсілдер өзгертілді. Абай облысы қалыптасу сатысында тұр және әлеуметтік азық-түлік корпорациясы әлі құрылған жоқ, сондықтан облысқа жоғарғы органдардан, оның ішінде ауыл шаруашылығы министрлігінен көмек көрсетілетін болады. Өзгерістерге тоқталатын болсақ, тұрақтандыру қоры маусымаралық тауарлық интервенциялар үшін қалыптасатын болады. Егер бұрын көкөністі сатып алу күнтізбелік бір жыл ішінде жүргізілсе, енді өндірушіге өнімді сату қажет болған кезде, сондай-ақ бағасы нарықтық және бәсекеге қабілетті болған кезде сатып алуға мүмкіндік бар, — деді бірінші вице-министр. Сондай-ақ жиналғандарға әлеуметтік әмиян арқылы әлеуметтік төлемдер алу мүмкіндігі туралы да айтылды. — Әлеуметтік әмиянға қатысты мәселеге жеке тоқталғым келеді. Қосымшаны іске қосқаннан кейін ол арқылы сатып алуларға, қызметтерге ақы төлеуге, қаражатты екінші деңгейдегі банктердің шоттарына аударуға болады. Қолданыстағы авторизация өте оңай. Уақыт өте келе барлық әлеуметтік төлемдер жинақталады, — деді Шаққалиев. Кездесу соңында Арман Шаққалиев азаматтар тарапынан көтерілген мәселелер Үкімет отырыстарында қаралатынын атап өтті. — Бізге жобалар уақытында іске асырылуы үшін уақтылы әрекет етіп, қажетті жағдайлар жасау қажет, – деп қорытындылады сөзін ҚР сауда және интеграция бірінші вицеминистрі.
