Қазақстан Республикасы Индустрия және жаңа технологиялар министрлігі Өнеркәсіп комитетінің төрағасы Бақтыбай Қасым- беков жұмыс сапарымен Семейде болды. Өнеркәсіп комитетінің төрағасы қала әкімі Айбек Кәрімовтің жетекшілігімен шаһардағы бірқатар жеңіл өнеркәсіп орындарын аралап, осы салада атқарылып жатқан жұмыстардың барысымен танысты.
Бүгінде Елбасы Нұрсұлтан Назарбаевтың шағын және орта кәсіпкерлікті дамыту жөніндегі тапсырмасына сәйкес, аймақтарда бірқатар отандық өндіріс орындарының жұмысы алға басып келеді. Бұл қоғамның нарықтық заманға бейімделгенін көрсетсе керек. Дегенмен отандық өндірістің ішіндегі кенжелеп қалғаны осы жеңіл өнеркәсіп саласы. Кеңестік кезінде жеңіл өнеркәсібі қарыштап дамыған Семейде тәуелсіздік алған алғашқы жылдары бұл сала тұралап қалған еді. Алайда, соңғы уақытта жеңіл өнеркәсіп саласы шаһарымызда қайтадан жанданып келеді. Ел Үкіметі де бұл саланың өсіп, өркендеуіне ынталы болып отыр.
Жұмыс сапарымен келген ҚР Индустрия және жаңа технологиялар министрлігі Өнеркәсіп комитетінің төрағасы Бақтыбай Қасымбеков алдымен тігін мен тері бұйымдарын өндіретін «Семспецснаб» кәсіпорынында болды. Мұнда ерлер мен балалар көйлегін, әскери қызмет-шілерге арналған жейделер, жұмысшылар киімдері, әскери қызмет-шілерге арналған пальто мен плащьтар, офицерлік құрамға арналған бас киімдер, кеудешелер және медициналық халаттар, жұ-мысқа арналған костюмдердің түрлі үлгілері тігіледі. «Семспецснаб» ЖШС өнімдерінің негізгі бөлігін еліміздің күштік құрылымдарына, ұлттық компаниялар мен өндіріс кәсіпорындарының қызметтік формасын тігіп, отандық өнімнің дамуына септігін тигізіп жатыр. Демек, ең басты — мекемелердің киімдерін ұқыппен тігетін фабрика уақыт талабынан шыға алатынына күмән жоқ. Қазір фабрика ерлер костюмдері мен мектеп формасы сынды жаңа өнім түрлерін шығаруды меңгеруде.
Заман талабына сай арнайы техникалық құрылғылармен жабдық- талған кәсіпорын бір жұмыс ағынында бірнеше киім түрін пішіп, тігіп шығарады. Ұжым мүшелері мекемелермен қатар, жеке тұлғалардың да тапсырысын қабылдай береді. Кәсіпорын басшыларының айтуынша, қазіргідей бәсекелестік жағдайында өнімдерімен алдыңғы сапқа шығуды мақсат тұтқан мекеменің аяқ алысы жаман емес. Өндірісті дамыту мақсатында фабриканың жаңа ғимарат құрылысын жүргізу де қолға алынған. Бір сөзбен айтқанда «Семспецснаб» өңірдің жеңіл өнеркәсіп саласындағы өндірісі өркендеп тұрған кәсіпорынның бірі.
{jcomments on}Семей қаласында Бақтыбай Қасымбеков «Технология комфорта» ЖШС жұмыс барысымен танысып, ондағы жұмыскерлерге арналған арнайы биялай өндірісі кешенін қарап шықты. Пластик терезелер, ағаштан жасалатын бұйымдар және мақта — матадан жұмыскерлердің биялайларын өндірумен айналысатын «Технология комфорта» ЖШС өнімдері еліміздің барлық аумағына, сонымен қатар Ресейдің елімізбен көршілес өңірлеріне жеткізіледі.
Жұмыскерлердің қолғаптарының өндірісі «Бизнестің жол картасы — 2020» мемлекеттік бағдарламасы аясында 2012 жылы іске қосылған еді. Жобаның қуаттылығы айына 300 мың жұп қолғапты құрайды. Соның арқасында 25 жаңа жұмыс орыны ашылды. Дегенмен бұл бағыттағы жұмыстар осымен тоқтап қалмақ емес. «Технология комфорта» ЖШС аталмыш өнім түрін жылына 6 миллион биялай сыңарын шығаруды жоспарлап отыр. Ол үшін жоба индустрализация картасына енгізілген.
Өнеркәсіп комитетінің төрағасы Бақтыбай Әшімбекұлы жұмыс сапарының соңында «Семей тері — былғары комбинаты» ЖШС-де болды. Комбинат директоры Жұмағазы Рахымғалиев өзі басқарып отырған комбинаттың тыныс-тіршілігімен жан-жақты таныстырды. Еліміздегі тері өңдеу саласындағы бірден — бір ірі зауыт Италиядан әкелінген құ-рылғылармен жарақталған. Ал өнімдер негізінен Үндістан, Италия, Қытай, Түркия сынды елдерге экспортталады. Жұмағазы Рахымғалиевтің айтуынша, семейлік теріге шетелдің сұранысы көп. Себебі, бұл өнімдер сапалы аяқ киім тігуге ыңғайлы. Комбинат жылына 450 мың ірі қара малының терісін өндіреді.
Бақтыбай Әшімбекұлының айтуынша, жалпы, қазіргі уақытта республикада 1,5 мыңнан астам жеңіл өнеркәсіп кәсіпорындары жұмыс істейді екен. Оның 90 пайыздан астамын шағын және орта кәсіп-орындар құрайды. Аталған секторда өндіріс көлемі соңғы 4 жылда 1,6 млрд. теңгеден 8,3 млрд. теңгеге дейін өсіпті. Дегенмен, бұл салада туындаған мәселелер де жоқ емес. Осыны ескерген Мемлекет басшысы жеңіл өнеркәсіп саласын дамытудың кешенді жоспарын әзірлеуді тапсырған.
— Жеңіл өнеркәсіп — Қазақстанда кенже қалып келе жатқан салаларының бірі. Елбасы осы саланы кешенді түрде жоспарлап, көтеру керектігін тапсырған еді. Елімізде жеңіл өнеркәсіп саласы Кеңес дәуірінде Шығыс Қазақстан, Жамбыл облыстарында және Оңтүстік Қазақстан мен Солтүстік Қазақстан облыстарында қарқын алған еді. Қазір жеңіл өнеркәсіп саласын дамытудың кешенді жоспары әзірленіп жатыр. Сондықтан, туындаған мәселелерді жеңіл өнеркәсіп саласының кәсіпкерлерімен талқылау мақсатында Семейге арнайы келдім. Кәсіпкерлермен кешенді жоспарды жан – жақты талқылауымыз керек. Менің ойымша, 2015 жылдан бастап кешенді жоспар іске қосылады. Кейін біз сол арқылы әр саланы жүйелі түрде дамытатын боламыз, — дейді Бақтыбай Әшімбекұлы.
Асан МЫРЗАХАНОВ,
«Семей таңы»
