16 қараша күні Семейге іссапармен ҚР оқу-ағарту министрі Асхат Аймағамбетов келді. Министр қаладағы бірқатар мектептерді аралап, Балалар мен жастардың шығармашылық сарайында білім беру саласының қызметкерлерімен, қоғам өкілдерімен кездесу өткізді.
Жадыра ТӨЛЕГЕНҚЫЗЫ,
«Семей таңы»
Кездесу барысында Асхат Қанатұлы білім беру сапасын арттыру жолында министрлік тарапынан атқарылып жатқан жұмыстар туралы баяндады. Өткен оқу жылындағы көрсеткіштерге тоқталып, саладағы жаңашылдықтар туралы да айтып берді.
Асхат Аймағамбетов 2019 жылы мұғалімдердің мәртебесіне қатысты Заң қабылданғанын, бүгінгі күнге дейін педагогтердың орташа жалақысы екі есеге артқанын еске салды. Білім беру саласындағы сыбайлас жемқорлықтың жолын кесу мақсатында педагогтер жұмысқа конкурс негізінде қабылданатынын, бұл орайда тек дипломның жеткіліксіздігін, ұлттық біліктілік тестілеуден өткені туралы сертификат міндетті екенін айтты. Министр сонымен қатар 1 сыныптар тек өз ана тілінде білім алып, 2 сыныпта орыс тілі (қазақ тілі), 3 сыныпта ғана ағылшын тілі енгізілетінін айтты. Осылайша, енді 1 сынып оқушылары бұрынғыдай үш түрлі әліпбиді бірдей меңгеріп, сарсаңға түспейтін болды. Бұл орайда басқа елдердің де тәжірибесі ескерілген. Асхат Қанатұлы сондай-ақ «Оқуға құштар мектеп» жобасы Абай облысында өз деңгейінде жүзеге аспай отырғанын жеткізді.
— Бұған себеп – қаражаттың жеткіліксіздігі. Дегенмен қазір оқушылардың кітап оқуға аса құштар емес екенін мойындауымыз керек. Мен бүгін бірнеше мектепте болып, кітапханаларды араладым. Кітапханаларға әдеби кітаптардың түспегеніне екі-үш жылдың жүзі болған. Абай облысы жаңадан құрылып жатқандықтан, алдағы уақытта бұл мәселе шешімін табады деп сенемін,- деді А.Аймағамбетов.
Асхат Қанатұлы инклюзивті білім беруді дамытуға, дамында ауытқуы бар балаларды ерте жастан анықтауға мемлекет тарапынан көңіл бөлініп отырғанын айтты.
— Қазір дамуында ауытқуы бар балалар саны көбейіп келеді. Өкінішке орай мұндай балалар балабақшаға барғанда ғана анықталып жатады. 1-2 жастан бастап ауруды анықтап, түзету шараларын қолданған дұрыс. Осындай әртүрлі ауытқуларды анықтау мақсатында елімізде ПМПК жұмыс істейді. Оның желісін кеңейту керек. Абай облысы бойынша бұл мәселе толығымен шешілген жоқ. Облыс әкімімен және білім басқармасы басшысымен бұл сұрақ төңірегінде әңгімелестік. ПМПК ауытқуларды анықтағаннан кейін, психологиялық педагогикалық түзету кабинеттерінде жұмыстар жүргізіледі. Олардың санын да көбейту күн тәртібінде тұр, — деген Асат Аймағамбетов тәрбиешілердің жалақысын көтеру және жүктемені азайту мәселесін де көтерді.
Оқу-ағарту министрі баяндамадан соң, білім беру қызметкерлерінің сұрақтарына жауап берді. Педагогтердің бірі жас мамандар жұмысқа қабылдау конкурсынан шарт бойынша төмен ұпай жинап, байқаудан өте алмайтынын тілге тиек етті.
— Біз жұмысқа жас мамандарды қабылдау туралы шарт қойып отырған жоқпыз. Тек қана байқау шартындағы үміткердің еңбек өтіліне қатысты ережені алып тастадық. Себебі көп жағдайда, еңбек өтілі педагогтің біліктілігінің кепілі бола алмайды. Сонымен қатар енді ағылшын тілі пәні мұғалімдерін жұмысқа қабылдау кезінде IELTS нәтижелері ескеріледі, — деді А. Аймағамбетов.
Білім беру саласының қызметкерлері мектептердегі зорлық-зомбылық, кәсіби бағдарлаушы және жаһандық құзыреттілік пәндері бойынша мұғалімдерДІҢ жалақысы, ұлттық біліктілік тестілеуіге қатысты сауалдарын қойды.
