Семей қаласының Шәкәрім атындағы университетінде ҚР Ақпарат және қоғамдық даму министрлігі және «Рух» Психология және тұлғаны дамыту орталығы» ЖШС-ның бірлесе ұйымдастыруымен медиация институтын дамыту жөнінде семинар-тренингі өтті. Оған ауыл әкімдері, білім беру мекемелерінің, этномәдени бірлестіктер мен Қазақстан халқы Ассамблеясының қоғамдық құрылымдарының өкілдері және студенттер мен медиаторлар қатысты.
Талшын Қалиасқар,
«Семей таңы»
Семинардың басты мақсаты – этносаралық қақтығыстарды реттеу бойынша білім мен дағдыларды қалыптастыру, алдын алу саясатын дамытуға ықпал ететін медиацияны пайдалану әдістері мен тетіктерін оқыту, қоғамдық келісім мен жалпыұлттық бірлікті нығайтуға байланысты қоғамдық ұйымдардың қызметінде жаңа нысандарды іздеу.
Жиында «Қолданбалы этносаяси зерттеулер институты» ЖШС директоры Талғат Қалиев, «Рух» «Психология және тұлғаны дамыту орталығы» ЖШС директоры Резеда Баймұхаметова және «Демеу» еріктілер корпусының жетекшісі Имир Дулатов баяндама жасап, этномедиацияның дамуы мен рөлі төңірегінде пікір алмасты.
— Медиация – жаңа әрі маңызды бағыт. Бұл әр түрлі қақтығыстарды шешуге көмектеседі. Сонымен қатар, этномедиация әдеттегіден түбегейлі ерекшеленіп, психологиялық аспектілерге әсер етеді. Медиацияның соттан ең басты айырмашылығы – ұтқан, ұтылған деген тарап болмайды, себебі олар екі жаққа қолайлы мәмілеге келуі керек, — деді «Қолданбалы этносаяси зерттеулер институты» ЖШС директоры Талғат Қалиев.
Тыңдаушылар пікір алмасып, тәжірибелерін бөлісті, этносаралық қатынастардағы медиацияның нормативтік-құқықтық базасымен, мәдениетаралық дамудың негізгі қағидаттары мен перспективаларымен танысты.
Айта кетейік, Қазақстанда медиация туралы заң 2011 жылы қабылданды. Мақсаты – сот жүйесіндегі ауыртпалықты азайту. Қазақстан халқы Ассамблеясының XXXI сессиясында Мемлекет Басшысы Қасым-Жомарт Тоқаев та этномедиацияны одан әрі дамытуға, ҚХА этномедиаторларын құқық қорғау қызметіне белсенді тартуға ерекше назар аударып, этномедиацияның оқу орталығын құруды тапсырды.
Медиацияға міндетті түрде үшінші тарап — медиатор қатысуы керек. Ол тәуелсіз, бейтарап, істің нәтижесіне мүдделі болмауға тиіс. Оны тараптар өзара келісіп таңдайды. Оның басты міндеті — даудан қос тараптың қанағаттанып шығуына көмектесу. Медиатордың судья секілді билігі болмайды, оның тараптарды қандай да бір шешім қабылдауға мәжбүрлеуге құқығы жоқ.
— Медиация — тараптардың дауды өзара келісіп шешетін шара. Ортақ шешімге келуге судья емес, медиатор деген маман көмектеседі. Келісімге келсе, тараптар өзара жазбаша келісім шартын жасасады. Ол медиация туралы шарт деп аталады. Бүгінде Абай облысында осы бағытта мақсатты жұмыс жүргізілуде. Мұнда 4 медиация кабинеті жұмыс істейді, -деді «Рух» Психология және тұлғаны дамыту орталығы» ЖШС директоры Резеда Баймұхаметова.
Семинар аясында кофе-брейк ұйыдастырылып, қатысушыларға сертификаттар мен алғыс хаттар табысталды.
