АХМЕТ БАЙТҰРСЫНҰЛЫНЫҢ ТУҒАНЫНА 150 ЖЫЛ
Биыл ұлт ұстазы, ақын, әдебиет зерттеуші ғалым, қоғам қайраткері Ахмет Байтұрсынұлының 150 жылдық мерейтойы ЮНЕСКО көлемінде атап өтілуде. Елімізде жыл басынан бері Алаш ардақтысының өмірі мен қызметін, артына қалдырған мұрасын дәріптеуге арналған ғылыми конференция, форум, айтыс, мүшәйра, фестиваль, байқау, т.б. форматтағы түрлі ша- ралар ұйымдастырылып келеді. Ал өткен жұма күні Абайдың «Жидебай-Бөрілі» музейі мәдениет және тілдерді дамыту бө- лімімен бірлесе отырып «Ұлт ұстазы — Ахмет Байтұрсынұлы» атты сайыс өткізді. Сайысқа қала мектептерінінің қазақ тілі және әдебиет пәнінің мұғалімдері қатысты.
— Бүгінгі сайысты жас ұстаздарға қолдау көрсету, жетістіктерін насихаттау, үздік тәжірибесін анықтау мақсатында ұйымдастырдық. Ең бастысы — Ахмет Байтұрсынұлының мұрасын оқушыларға қалай жеткізетіндерін білу, өзара тәжірибе алмасуларына мүмкіндік жасау. Екі кезеңнен тұратын сайыстың бірінші кезеңінде қатысушы ұстаздар «Ахметтің білім даналығы» тақырыбына эссе жазды. 17 ұстаздан келіп түскен шығармашылық жұмысты әділ қазы алқасы бағалап, 10 эссені таңдап алды. Сайыстың екінші кезеңіне жұмыстары үздік деп танылған осы 10 мұғалім жіберілді,- дейді ұйымдастырушылардың бірі, «Жидебай-Бөрілі» музейінің ғылыми хатшысы Раушан Елекенова. Әділ қазылар алқасы құрамындағы мәдениет және тілдерді дамыту бөлімінің басшысы Маржан Бахатова, қалалық білім бөлімінің әдіскері Нұргүл Байсарина, Әлихан Бөкейхан университетінің оқытушысы, филология ғылымдарының докторы, профессор Гүлнат Төкенқызы, қаламызға Қостанай облысынан Ахмет Байтұрсынұлының 150 жылдық мерейтойына арналған «Ұлтын ұлықтаған ұлы тұлға» көрмесін алып келген «Торғайдың Жанкелдин мұражайлар кешені» директоры Гүлбану Сәрсекей және Абай музейінің аға ғылыми қызметкері Қуат Қиықбай сайысқа қатысушылардың жазба жұмысы мен ұлт ұстазының өмірі мен шығармашылығы жайлы білімдерін бағалады. Сайыстың «Ізденіс» деп аталған 2-ші кезеңінде қатысушылар жеребе тартып, Ахмет Байтұрсынұлының шығармаларын оқытуда қандай инновациялық әдіс-тәсілдерді қолданатындарын, сабақты қалай өткізетіндерін айтып берді. Одан соң қатысушыларға ұлт ұстазының шығармашылығы мен өміріне қатысты сұрақтар қойылды. Көпшілігі бұл сұрақтарға дұрыс жауап бергенімен, байқаудың тақырыбы алдын ала белгілі болса да, жауап қайтара алмай мүдіргендер де болды. Ұлт ұстазының шығармашылығы мен өмірі арқау болған сайыстың қорытындысы бойынша, «Знаменка» жалпы орта білім беретін мектебінің мұғалімі Жаннұр Серіққали жеңімпаз атанды. ІІ орын №20 жалпы орта білім беретін мектептің мұғалімі Маусымжан Тұрсын мен №30 жалпы орта білім беретін мектептің мұғалімі Жансая Сағындықоваға бұйырды. ІІІ орынды №3 жалпы орта білім беретін мектептің мұғалімі Еркежан Аманбердина, №46 жалпы орта білім беретін мектептің мұғалімі Назгүл Қасенова және №6 мектеп-гимназияның мұғалімі Еркежан Кемелтай еншіледі. Сайыс жеңімпаздары дипломдармен және бағалы сыйлықтармен марапатталды. Қатысушылар мен ұйымдастырушылардың айтуынша, осындай байқаулар мектеп ұстаздарының мәртебесін көтеріп, кәсіби шеберліктерін арттыруға ықпал етеді. Сондықтан алдағы уақытта ұстаздар арасында түрлі байқаулар жиі ұйымдастырылып тұруын тек құптау керек.
Зарина КӘП,
«Семей таңы»
