Мүмкіндігі шектеулі жандардың құқығы мен әлеуметтік қорғалуын қамтамасыз ету – мемлекеттің әлеуметтік саясатының маңызды бағыттарының бірі. Елімізде мүгедектігі бар адамдардың өмір сүру сапасын арттыру үшін кешенді шаралар жүзеге асырылып жатқаны белгілі. Әсіресе әлеуметтік және көліктік инфрақұрылым нысандарының қолжетімділігін қамтамасыз ету, ғимараттарды бейімдеудің маңызы зор. Ерекше қажеттіліктері бар адамдар үшін кедергісіз орта қалыптастыру мақсатында Абай облысында да нақты жұмыстар жүргізілуде.
Бүгінде облысымызда 24 272 мүмкіндігі шектеулі жан бар. «АMANAT» партиясының мүгедектігі бар адамдардың әл-ауқатын жақсартуға бағытталған «Өзгерістер жолы: әркімге лайықты өмір!» атты сайлауалды бағдарламасы шеңберінде Абай облысы бойынша «АMANAT» партиясының сайлауалды бағдарламасы аясында 2025 жылға дейін 1213 нысанды бейімдеу жоспарланған: 2021 жылы – 134 нысан, 2022 жылы – 111 нысан, 2023 жылы – 105 нысан, 2024 жылы – 36 нысан, 2025 жылы — 44 нысан.
Жол картасының іс-шараларын іске асыру үшін мониторинг тобы құрылып, тиісті жұмыстар жүргізуде. INVA.GOV.KZ сайтында облыс бойынша 1241 нысан тіркелсе, оның ішінде 255 нысан толық бейімделген.
Еңбек және әлеуметтік қорғау комитетінің Абай облысы бойынша департаментінің негізгі міндеттерінің бірі «Қазақстан Республикасындағы мүгедектігі бар адамдарды әлеуметтік қорғау туралы» және «Арнайы әлеуметтік көмек көрсетулер туралы» Заңдардың сақталуына бақылау жүргізу болып табылады. Осы бағыттағы іс-шаралар объектілерге бару арқылы профилактикалық бақылау немесе жеке және заңды тұлғалардың өтініштері бойынша жоспардан тыс тексеру жүргізу арқылы өткізіледі.
Айта кетерлігі, мониторинг топтары тарапынан берілген ұсыныстар орындалмаған жағдайда, яғни бұзушылықтар жойылмаса, жергілікті атқарушы органдар тексеру жүргізу үшін арнайы хат жазу арқылы департаментке жүгінеді. Департамент мамандары келіп түскен өтініштерге сәйкес бұзушылықтарды орындамаған объектілерге қатысты жоспардан тыс тексеру жүргізеді, нәтижесінде ҚР Әкімшілік кұқық-бұзушылық туралы кодексінің 83-бабы бойынша әкімшілік шаралар қабылданады. Аталған Кодекстің 83-бабы бойынша, яғни мүгедектердің әлеуметтік және көлік инфрақұрылымы объектілеріне және мәдени ойын-сауық іс-шараларына қолжетімділігі қамтамасыз етілмесе, лауазымды тұлғаларға — елу, шағын кәсіпкерлік субъектілеріне — жүз жиырма, орта кәсіпкерлік субъектілеріне — екі жүз, ірі кәсіпкерлік субъектілеріне төрт жүз айлық есептік көрсеткіш мөлшерінде айыппұл салынады.
Облысымыздағы әрбір мемлекеттік ұйым немесе кәсiпкерлiкпен айналысатын жеке және заңды тұлғалар өздерінің қызметтерін жүзеге асыру барысында мүгедектігі бар тұлғалардың нысандарға қолжетімділігін қамтамасыз ететін болса, яғни толығымен жағдай жасаса, келешекте мүгедектігі бар адамдар үшін «кедергісіз орта» қалыптасары сөзсіз.
А.ЕРЕМБАЕВА,
Еңбек және әлеуметтік корғау министрлігі Еңбек және әлеуметтік қорғау комитетінің Абай облысы бойынша департаменті басшысы
