ОТАНДЫҚ ӨНДІРІСТІ ҚАЛАЙ ДАМЫТУҒА БОЛАДЫ?

Абай облысының «Атамекен» кәсіпкерлер палатасы жанындағы Агроөнеркәсіптік кешенді (АӨК) дамыту жөніндегі кеңестің төрағасы, облыстық мәслихат депутаты, АӨК және экологияны дамыту жөніндегі комиссияның мүшесі Талғат Баймұрынов аймағымыздағы ауыл шаруашылығы саласындағы негізгі мәселелер жайлы ойын ортаға салды.
Агроөнеркәсіптік кешенді дамыту жөніндегі кеңестің негізгі міндеті – отандық кәсіпкерлер мен тауар өндірушілерді қолдау, сондай-ақ ауыл шаруашылығының өзекті мәселелерін шешуге көмектесу. Облыстың кәсіпкерлер палатасы жанындағы АӨК дамыту жөніндегі кеңестің төрағасы Талғат Баймұрынов өңірде саланы өркендету үшін бірінші кезекте қандай мәселелерге назар аудару керектігін атап өтті.
— Бірінші кезекте бәрі қаржыландыруға келіп тіреледі. Айталық, биыл ауыл шаруашылығын дамытуға небәрі екі миллиард теңге бөлінді. Миллиардтаған қаражат бөлінсе де, нәтиже көрінбейді. Себебі бұл екі млрд теңге бір кәсіпорынға ғана берілуі керек. Мұндай азын-аулақ қаражат ештеңеге жетпейді, сондықтан ешқандай нәтиже болмайды. Жобалар әзіреп, оларды барынша қаржыландыру керек,- деді Т.Баймұрынов.
Депутаттың айтуынша, бірінші кезекте, суару жүйесіне баса назар аудару қажет. Қазақстанның климаты құбылмалы болғандықтан, егіншілік үшін қауіп-қатер жоғары. Осы қауіп-қатерді барынша азайту үшін алдымен суару жүйесі жолға қойылуы тиіс.
— Егер суару мәселесі шешілсе, егін де өседі, мал азығына да кепілдік болады, еттің де өзіндік құны түседі. Су тапшылығы ШҚО, Абай және Павлодар облыстарында, жалпы, бүкіл Қазақстанда өзекті мәселе. Ертіс – суы мол өзен. Сондықтан жағалаудан 5 шақырымға дейін барлық егістік суарылуы керек. Сонда нәтиже болады, – дейді депутат.
Кәсіпкердің айтуынша, халық денсаулығын сақтау үшін отандық тауар өндірушілерді қолдаудың маңыздылығы зор.
— Ресейден келетін сүт өнімдерінің 70 пайыздан астамы — контрафакт. Мұндай өнімге әктен бастап бәрін қосады. Осындай уды тұтынған бізден қандай ұрпақ туады? Болашағымыз не болады? Сондықтан азық-түлік қауіпсіздігі баса назарда болуы тиіс. Тәжірибесі бар және өзін дәлелдеген отандық кәсіпорындарды 2-5 млрд теңгеге қаржыландыру керек. Олар аз уақыттың ішінде-ақ жақсы нәтиже көрсетіп, қарызын қайтарып, экономикамызға жан бітіреді. Осындай 10-15 жобаны қаржыландыру арқылы екі-үш жыл ішінде елдегі сүт мәселесін толықтай шешуге болады. Тіпті экспортқа шығуымыз мүмкін. Қаражатты созбай, жұлмаламай, кәсіпорын қызметіне араласпай, нақты көмек беру керек, – деп есептейді Талғат Баймұрынов.
Агроөнеркәсіптік кешенді дамыту жөніндегі кеңес төрағасы мемлекеттік қызметшілерді жұмысқа деген көзқарасты өзгертіп, назарды маңызды емес міндеттерді орындауға емес, мәселелерді шешуге аударуға шақырды.
— Мемлекеттік қызметшілердің басым бөлігі инерция бойынша жұмыс істейді. Тапсырма берілсе, оны есеп аясында ғана орындайды. Жақында өткен инвестициялық форумға вице-министр келді. Мен де сол жерде ауыл шаруашылығы саласындағы мәселелерді айттым. Мемлекеттік органдарға «сұрау жіберіп, жауап алу үшін» маған форумнан кейін қалуымды өтінді. Мұндай тұжырымның өзі айтып тұр. Бұл тәсіл нағыз шенділердікі. Кәсіпкерлер хат жазып, хат жіберіп, жауап күтуге емес, мәселені нақты шешуге машықтанған,- деді Т.Баймұрынов.
Сөз соңында халық қалаулысы саланы дамытуға бар күш-жігерін салуға дайын екенін жеткізді.
— Мені АӨК-ті дамыту жөніндегі кеңесті басқаруға шақырған кезде, қуана келістім. Өйткені кәсіпкерлер палатасы — белгілі бір беделге ие маңызды ұйым. Өңірлік палатмен және облыстық мәслихатпен бірлесе отырып саладағы түйткілді мәселелерді шешу үшін бір бағытта жұмыс істейтін боламыз, – деді «АКП» АӨК дамыту жөніндегі кеңестің төрағасы.
Еске салсақ, өңірлік палата жанындағы салалық кеңестер мемлекеттік органдармен тиімді ынтымақтастық орнату мақсатында құрылды. Жиындар айына бір рет өткізіледі.
atameken.kz