Мемлекет басшысы Қасым-Жомарт Тоқаев халыққа Жолдауында ауыл медицинасының ахуалын жақсарту жөнінде тапсырма бергені белгілі. Биыл медицина саласын дамытуға 460 млрд теңге жоспарланып, оның 40%-ы ауыл-аймақтарға бөлінген болатын. Жалпы, тәуелсіздік жылдарында денсаулық сақтау саласын дамыту мақсатында аз жұмыс атқарылған жоқ. Әсіресе, пандемия кезінде елімізде медицина саласына ерекше назар аударылды.
Аймағымыздағы тұрғындар ең көп шоғырланған үлкен ауданның бірі – Үржар ауданы. Ауыл медицинасының ахуалын білу мақсатында Үржар ауданының көпсалалы орталық ауруханасының бас дәрігері Баубек Абылқасымовпен сұхбаттасып, аудандық аурухананың материалдық-техникалық базасының нығайып, мемлекеттік бағдарламалар аясында шалғай ауылдарда да медициналық қызмет сапасының артып отырғандығына көз жеткіздік.
Асылхан Садақбаев,
«Semeı tańy»
Шыр етіп жарық дүние есігін ашқан нәрестеден бастап, еңкейген қартқа дейін ақ халатты дәрігерлер қызметіне жүгінетіні рас. Олардың еңбегін қажетсінбейтін жан бұл өмірде кемде-кем. Өз істерінің нағыз шебері бола білген ақ халатты жандар талай адамның жүрегіне үміт отын жағып, өмір гүлін сыйлап келеді. Медициналық мекемелердің материалдық-техникалық жабдықталуынан бөлек, дәрігерлердің біліктілігі басым рөл атқарады. Ұлыбритания мемлекетінде білімін жетілдірген, Жоғарғы санатты бас дәрігер, жоғарғы санатты терапевт дәрігер, экономика ғылымдарының магистрі, Абай облысындағы шетелде білімін жетілдірген тұңғыш қазақ дәргерлерінің бірі, Үржар ауданының көпсалалы орталық ауруханасының бас дәрігері Баубек Шайзаданұлы аурухана ұжымының халық саулығын сақтау жолында аянбай еңбек етіп жатқанын тілге тиек етті.
-Біздің ұжымдағы дәрігерлер еңбек жолында қаншама жанды ажал аузынан арашалап жүрген майталман мамандар десем, артық айтқандығым болмас. Маман дәрігерлерден бөлек, медбикелер мен тазалықшылар жұмыс істейді. Олар ауруханадағы науқастардың таза жерде уақытымен ем-дом алуына жағдай жасайды, ауруынан айығуына көмектеседі. Науқастардың жағдайын жасап қана қоймай, олардың көтеріңкі көңіл-күйде болып, сырқаттанған кезде күйзеліске түсіп кетпеуіне, ізгі ой ойлауына ықпал жасайды,- деді бас дәрігер.
Кез келген елдің ең басты байлығы – халқының денсаулығы. Сондықтан да, денсаулық сақтау саласының жағдайы қашан да Үкіметтің ерекше назарында болған. Солай болып қала бермек. Сапалы және қолжетімді медициналық көмек көрсетуді мақсат еткен «Дені сау ұлт» ұлттық жобасы аясында Үржар ауданы да тысқары қалып отырған жоқ.
-Қазақстан Республикасының денсаулық сақтау саласындағы мекемелердің және сол салада қызмет атқаратын мамандардың басты мақсаты – халқының денсаулығын сақтау мен нығайту үшін қолжетімді және сапалы медициналық көмекті көрсету. Осыған орай, Үржар ауданының көпсалалы орталық аудандық ауруханасының мамандары да өздерінің барлық білімін, күш-жігерін аямай халыққа еңбек етіп, терін төгуде. Әрі жұртшылықпен қарым-қатынасты одан әрі жеңілдетіп, аясын кеңейту мақсатында аурухананың инстаграмм парақшасын ашып, жергілікті тұрғындармен тығыз байланыс жасалынып отырады. «Дені сау ұлт» жобасы бойынша Үржар ауданында Аурухана медициналық заманауи құрал жабдықпен 87,9 пайызға жабдықталып, халыққа сапалы қызмет көрсету мақсатында соңғы төрт жылда КТ аппараты, ПЦР зертханасы, цифрлық маммография, «4Д» УДЗ аппараттары, 250 литрлік кислородтық станциясы, зертханалық анализаторлар және стоматологиялық құрылғылар, R-цифрлі рентген және 2022 жылы цифрлық R-рентген/флюорография, цифрлық маммография сияқты заманауи құрал-жабдықтарымен қамтамасыз етілді,- деп атап өтті Баубек Абылқасымов.
Бұдан бөлек, реанимациялық іс-шараларды көрсету үшін 19 желдеткіш аппаратты мен 39 төсек жанындағы мониторлармен, 9 дефибриляторлармен, 30 дана Бобров аппаратымен, 80 дана концентратрмен, 2 балаларға арналған желдеткіш аппаратымен жабдықталып, жұрт кәдесіне жарауда.
Сонымен бірге, облыстық бюджеттен перзентхана бөлімін материалдық жабдықтау үшін 287 212 570 теңге және Таскескен перзентхана бөлімін материалдық жабдықтауға 61 609 170 теңге қаржы қарастырылып, қажетті құрал-жабдықтармен қамтылып отыр. Сондай-ақ қажетті аппаратура және құралдармен жабдықталған физиотерапиялық, функционалды диагностика секілді қосалқы бөлімдер, атап айтқанда: функционалды диагностика бөлімінде ЭКГ, Эхокардиография, Holter ЭКГ мониторингі, қан қысымы мониторингі, өкпе желдету қуаты және тыныс алу функциясын бағалау, колоноскоп, гастроскоп, физиотерапия кабинетінде 20 түрлі аппараттар жұмыс жасап аудан тұрғындарының еміне шипа болу үшін қызмет етуде.
-Қазіргі таңда аудандық ауруханада 1 кешенді холтер мониторингі қызмет көрсетіп тұр. Бірақ бқл аздық етеді. Маусым айында «Дәрілік заттар мен медициналық бұйымдарды сараптау» ұлттық орталығынан кешенді холтер мониторингі аппаратын алуға қорытынды алынып, сол күні облыстық Денсаулық сақтау басқармасына 10 кешенді холтер мониторингі аппаратымен қамтамасыз етуге өтініш бердік.
Халыққа медициналық көмекпен уақытылы және сапалы қызмет көрсету үшін 46 автокөлік, оның ішінде мамандандырылған 2 автокөлік бар. Соңғы жылдары аурухананың өз қаражат есебінен 4 автокөлік сатып алынды,- деді бас дәрігер.
Жалпы әңгіме барысында байқағанымыздай, жыл өткен сайын аурухананың материалдық-техникалық базасы нығайып келеді. Үржар ауданының аудандық ауруханасының емхана бөліміне толықтай заманауи жаңарту жұмыстары жүргізіліп, жиһаздармен жабдықталып, жылдамдығы жоғары интернет желісімен, компьютерлермен, ыстық-суық сумен қамтамасыз етілген. Соңғы төрт жылда 294-компьютер, 127-принтер, 12-ноутбук сатып алынды. 30 жылда тозығы жеткен жеделсатының орнына екі заманауи жеделсаты орнатылыпты. Үржар ауданының орталық аудандық ауруханасының ғимараттарының және Таскескен дәрігерлік амбулаториясының шатырлары мен жылу қазандықтары, жылу трассалары толықтай ауыстырылып, аудандық аурухананың қызметкерлеріне және келушілерге арналып автотұрақ жасалынған.
Заманауи құрылғылар ауруды дер кезінде анықтап, ем тағайындауға жол ашса, заманауи үлгіде жабдықталған бөлмелер дертіне дауа іздеген жандардың көңіліне қуаныш ұялатары сөзсіз. Осы ретте жұқпалы аурулар, жан сақтау, гинекология және балалар, терапия және қабылдау бөлімдерінде ағымдағы жөндеу жұмыстары жүргізілсе, Қызыл-ту, Айтбай ауылдарындағы фельдшерлік-акушерлік пункттер мен Қазымбет, Қарамойыл, Егінсу, Теке-бұлақ, Малақ медициналық пункттерінде, Үржар №3, Жаңа-Тілек, Науалы дәрігерлік амбулаторияларында күрделі құрылыс жұмыстары жүргізілді. Үржар ауданының аудандық ауруханасының стационарлық және ас даярлау бөлімдері жаңартылуда. Өткен жылы Қазымбет, Қарамойыл медициналық пункттерде күрделі құрылыс жұмыстары жүргізіліпті. Барлық жөндеу жұмыстары Үржар ауданының орталық аудандық ауруханасының өз қаражат есебінен жасалынғандығын да айта кеткен ләзім.
-Санаулы күн бұрын Қаратұма ауылында дәрігерлік амбулаторияға арналған жаңа ғимараттың құрылыс жұмыстары аяқталды. Биыл «Ауыл-ел бесігі» бағдарламасы шеңберінде Үржар ауылының №2 дәрігерлік амбулаториясының жаңа ғимаратының құрылыс жұмыстары басталды. Үржар ауылындағы Семушкина көшесінің бойында 10 төсектік күндізгі стационар мен 50 келушіге арналған дәрігерлік амбулаториясының құрылысы басталды.
1946- 1958 жылдары салынған ескі, тозығы жеткен, апатты жағдайдағы ғимараттардың орнына «Ауылдық денсаулық сақтауды жаңғырту» пилоттық ұлттық жобасы аясында Некрасовка фельдшерлік-акушерлік пункті және Батпақты, Благодатное, Ер-Қабанбай, Қарабұйрат, Лай-бұлақ медициналық пункттері, Жоғарғы Егінсу, Ақжар дәрігерлік амбулаториясына жаңадан ғимараттар тұрғызу жобасы алдағы жылдарға жоспарланып отыр. Біз өз тарапымыздан, барлық қажетті құжаттарды дайындап, «Абай облысының құрылыс, сәулет және қала құрылысы басқармасы» ММ-не тапсырдық. Осы атқарылып жатқан жұмыстар, халықтың игілігіне жасалып жатқан маңызы зор істер деп санаймыз,-деді Үржар ауданының көпсалалы орталық ауруханасының бас дәрігері Баубек Абылқасымов.
Жоспар жүзеге асып, ауылдарда заманауи үлгіде жабдықталған жаңа медициналық ғимараттар пайдалануға берілсе, халық саулығына септігін тигізері хақ.
Мамандығына мансап деп қарамай, адамгершілік парызым деп білген бас дәрігер өз ұжымындағы дәрігерлердің білімін көтеруді жақсы жолға қойып отыр. Бүгінде шәкірттері Қазақстанда және шет елдерде табысты еңбек етуде. Үржар ауданының медицина саласына зор үлес қосып, қажетті аппаратура және құралдармен жабдықталған физиотерапиялық, функционалды диагностика секілді қосалқы бөлімдердің ашылуына тікелей ықпал еткен бас дәрігер Баубек Шайзаданұлы әріптестерінен бөлек, аймақ халқының да құрметіне бөленіп келеді. Әрдайым біліктілігін арттыруға көңіл бөлетін, ізденіс үстіндегі басшы ұжым мүшелерінің де тәлім алып, біліктілігін арттыруына көп көңіл бөлетіндігін айта кеткен жөн болар. Тәжірибесі мол дәрігерлер Барқытбел баурайындағы тұрғындардың саулығын сақшыдай қорғайтынына сенім зор.
