Кеше, 20 қыркүйек күні ҚР Еңбек және халықты әлеуметтік қорғау вице-министрі Олжас Ордабаев Абай атындағы кітапханада облыс тұрғындарымен кездесті.
Жадыра ТӨЛЕГЕНҚЫЗЫ,
«Semeı tańy»
Кездесуде әлеуметтік-еңбек саласының өзекті мәселелері, жұмыспен қамтуға жәрдемдесу, еңбек қауіпсіздігі және еңбекті қорғау, әлеуметтік қызмет көрсету жүйесін жаңғырту, сондай-ақ әлеуметтік-еңбек саласын цифрландыру барысы талқыланды.
Вице-министр ҚР Әлеуметтік кодексіндегі өзгерістер, соның ішінде Отбасының цифрлық картасы жайлы айтып берді. Отбасының цифрлық картасы мемлекеттік органдардың қолданыстағы барлық ақпараттық жүйелерінің деректері негізінде қалыптастырылады. Мұнда отбасының денсаулық сақтау, білім беру және әлеуметтік қорғау салалардағы статусы, жағдайы туралы ақпараттар жинақталады. Бүгінгі таңда цирфлық картада Қазақстанның 19,8 млн-нан астам азаматы немесе 6 млн-нан астам отбасы туралы ақпарат бар.
— Отбасының цифрлық картасын енгізудің нәтижесінде 2023 жылдың 1 қаңтарынан бастап 595,9 мыңнан астам адамға мемлекеттік қызметтерді проактивті көрсету үшін SMS-хабарлама жолданды. Бұл ретте өтініш берусіз жәрдемақы немесе төлем алу мүмкіндігін 222,5 мыңнан астам адам пайдаланды. Сонымен қатар, 64,6 мыңнан астам жұмыссыз азамат жұмыс іздеу мүмкіндіктері туралы, тегін оқудан өту және жұмыспен қамту саласындағы басқа да мемлекеттік қолдау шаралары туралы ақпарат алды,- деді О.Ордабаев.
Қазіргі уақытта ОЦК мемлекеттік қолдау шараларын алуға құқығы бар қазақстандықтарға өтінішсіз жәрдемақылар мен әлеуметтік төлемдердің 10 түрін ресімдеуге мүмкіндік береді. — Мемлекеттік қолдау шараларын алуға құқықығы бар азаматарға 1414 бірыңғай байланыс орталығынан SMS-хабарлама жіберіледі. Хабарлама алған азамат оған келісімі туралы жауап беруі керек. Өтінішті ресімдеу және әлеуметтік жәрдемақы немесе төлем тағайындау автоматты режимде жүргізіледі, содан кейін ақша қаражаты алушының банк шотына аударылады. Мәселен, жас босанған ана перзентханада жатқанда оған жәрдемақы алу туралы хабарлама келеді. «Иә» деп жауап беріп, банктегі шот нөмірін жіберсе, босанғаны үшін біржолғы жәрдемақы бірден аударылады. Бұл жүйе өте ыңғайлы,- деді вице-министр.
Өндірістік жарақаттану деңгейін төмендету мақсатында 2030 жылға дейінгі қауіпсіз еңбек тұжырымдамасының жобасы әзірленді. Атап айтқанда, жұмыс орнында кәсіптік тәуекелдерді бағалаудың жаңа моделін енгізу, кәсіптік тәуекел дәрежесі бойынша сақтандыру тарифін саралау, кәсіпорындардың цифрлық картасын құру және еңбекті қорғау саласында мемлекеттік бақылау мен мониторингтің проактивті форматын енгізу қолға алынбақ.
— Біздің министрлік зиянды еңбек жағдайларында жұмыс істейтін адамдарды әлеуметтік қорғау деңгейін арттыру үшін осы санаттағы азаматтарға 55 жастан бастап зейнеткерлік жасқа толғанға дейін арнаулы әлеуметтік төлемді енгізу мәселесін пысықтауда, – деді Олжас Ордабаев.
Халықтың табысын арттыру мақсатында 2024 жылғы 1 қаңтардан бастап ең төменгі жалақы мөлшері (бұдан әрі – ЕТЖ) 70 мың теңгеден 85 мың теңгеге дейін ұлғайтылады. Нәтижесінде барлық әртүрлі саладағы меншік нысандарындағы кәсіпорындарда жұмыс істейтін 1,8 млн-ға жуық жалдамалы жұмыскердің, оның ішінде 350 мыңға жуық бюджеттік қызметкердің ақшалай табысы артады.
Саладағы тағы бір жаңашылдық — әлеуметтік қызметтер порталының қолжетімділігін арттыру үшін мүгедектігі бар адамдар оңалтудың техникалық компенсаторлық құралдарына тапсырыс бере алатын «Aleumet» қосымшасы әзірленіп, іске қосылды.
Қосымша толығымен тегін қызмет көрсетеді және оны «App Store» немесе «Play Маркеттен» жүктеп алуға болады.
— Болашақта бұл қосымша жетілдіріледі, мүгедектігі бар адамдарға ұсынылатын басқа қызметтерге тапсырыс беру мүмкіндігі пайда болмақ. Оларға санаторлық-курорттық емдеу, ымдау тілі маманы, жеке көмекші және басқа да арнайы әлеуметтік қызметтер қосылады. 2023 жылдың басынан бастап мүгедектігі бар адамдар Әлеуметтік қызметтер порталы арқылы 377 мыңнан астам қызмет алса, олардың басым бөлігі оңалту құралдарына тапсырыс берген. Тапсырыс беру қызмет алушының электрондық цифрлық қолтаңбасымен растау арқылы жүзеге асырылады,- деді вице-министр.
Вице-министр салада цифрландыру қарқынды дамығанын және азаматтарға жұмыспен қамту орталықтарына барудың да қажеті жоқ екенін атап өтті. Оның айтуынша, электрондық еңбек биржасы арқылы жұмыссыз ретінде тіркеліп, жұмыс табуға да болады.
Кездесу соңында виуе-министр облыс тұрғындарының сұрақатрына жауап берді. Азаматтар Семей ядролық полигонынан зардап шеккендерге нақты әлеуметтік көмек көрсету, оңалту, мүмкіндігі шектеулі жандарға қоғамда жағдай жасау сынды өзекті мәселерді көтерді.
Еңбек және халықты әлеуметтік қорғау вице-министрі Олжас Ордабаев жұмыс сапары аясында Семей қаласындағы «УК ЮНИС» ЖШС кәсіпорнының және Дағдарыс орталығының жұмысымен танысты.
ҚР Еңбек және халықты әлеуметтік қорғау вице-министрі сапарын өңірлік БАҚ өкілдеріне арналған баспасөз мәслихатымен қорытындылады.
