Semeytany.kz — Облыс әкімі Берік Уәли Семей қаласындағы бірқатар әлеуметтік нысандардың құрылыс барысын қарап, Бобровка кентінде жеке инвестиция есебінен бой көтеріп жатқан денешынықтыру-сауықтыру кешеніне барды.
Аймақ басшысы мердігерлерге жұмысты сапалы орындап, мерзімін сақтауды тапсырды. «Бұл кешенде тек Бобровка тұрғындары ғана емес, жақын маңдағы “Мұрат” саяжайындағы халық та спортпен шұғылданатын болады. Қаламызда дәл осындай нысан Водный кентінде де салынып жатыр. Бұл — шеткері аудандар тұрғындарының бұқаралық спортқа қолжетімділігін арттыруға мүмкіндік береді», — деді Берік Уәли.
Бобровка мен Мұрат тұрғын үй алаптарында спорттық және әлеуметтік инфрақұрылым жеткіліксіз. Осы олқылықтың орнын толтыру үшін құны 700 миллион теңгені құрайтын екі қабатты кешен салынуда. Жалпы ауданы 720 шаршы метрді қамтитын ғимаратта ойын және күрес залдары қарастырылған. Құрылысы мамыр айында бастап, желтоқсанда пайдалануға беру жоспарланған.
Водный кентіндегі ұқсас денешынықтыру-сауықтыру кешенінің құрылысы 70 пайызға орындалды. Нысанды жыл соңына дейін іске қосу көзделген.
Ұшақтар шағын ауданында «Самұрық-Қазына» әл-ауқат қоры мен Абай облысы әкімдігінің серіктестігімен спорттық сауықтыру кешені салынуда. Жалпы аумағы 1,1 гектар жерді қамтитын жоба көлемі — 1770 шаршы метр. Екі корпустан тұратын нысан бір мезетте 115 адамды қабылда
й алады: 11 үстелге арналған теннис залы, күрес және заманауи жаттығу залдары, сондай-ақ ашық футбол алаңдары жоспарланған. Құрылысты келер жылдың қыркүйегінде аяқтау көзделген.
