Облыстың 2023 жылғы І жартыжылдықтағы әлеуметтік-экономикалық дамуының қорытындылары өнеркәсіп өндірісі, ауыл шаруашылығы, бөлшек және көтерме сауда тауар айналымы, құрылыс жұмыстары және негізгі капиталға салынған инвестициялар көлемінің артқандығын көрсетті.
Асылхан Садақбаев,
«Semeı tańy»
Бұл туралы Абай облысының өңірлік коммуникациялар қызметінде Ұлттық статистика бюросының Абай облысы бойынша департаменті басшысының орынбасары Сертай Базаровтың қатысуымен өткен баспасөз конференциясында айтылды.
«2023 жылғы қаңтар-маусым айларында өнеркәсіп өндірісінің көлемі 673,7 млрд. теңгені, өнеркәсіп өндірісінің индексі 110,6 пайызды құрады. Республикалық өнеркәсіп өндіріс көлемінің 3 пайызын біздің облыс өндірді. Кен өндіру өнеркәсібі және карьерлерді қазуда өндіріс көлемі 6,8 пайызға, өңдеу өнеркәсібінде 19 пайызға, электр энергиясымен, газбен, бумен, ыстық сумен және ауаны кондициялаумен жабдықтау 10,9 пайызға, сумен жабдықтау, қалдықтарды жинау, өңдеу және жою, ластануды жою бойынша қызмет 15,7 пайызға артты»,- деді Ұлттық статистика бюросының Абай облысы бойынша департаменті басшысының орынбасары Сертай Базаров.
Ағымдағы жылдың қаңтар-маусымдағы ауылшаруашылығының жалпы өнім көлемі 143,7 млрд. теңгеге жетіп, өткен жылғы кезеңмен салыстырғанда нақты көлем индексі бойынша 103,2 пайызды құрады. Және мал шаруашылығының биылғы қаңтар-маусымдағы өнім көлемі 2022 жылғы сәйкес кезеңмен салыстырғанда 3,2 пайызға артты.
Бөлшек сауда тауар айналымының көлемі 2023 жылдың жарты жылдығында 213,9 млрд. теңге жеткендіктен, былтырғы қаңтар-маусым көрсеткішіне қарағанда қолданыстағы бағалар 20,4 пайызға, салыстырмалы бағалар 3,3 пайызға артқанын байқай аламыз. Және көтерме сауда тауар айналымының көлемі 2022 жылғы кезеңнің бағаларымен салыстырғанда 6,1 пайызға көбейіп, 119,9 млрд. теңгені құрады. Коммерциялық тасымалмен айналысатын көліктік емес ұйымдар мен кәсіпкерлердің жүк айналым көлемі 2023 жылдың жарты жылдығында 7,5 млрд. тонна-километрді көрсетіп, өткен жылғы кезең деңгейінен 13,4 пайызға кеміді.
Сонымен қатар конференция барысында мердігерлік жұмыстардың облыстық көлемдегі негізгі үлесі, капиталға салынған инвестициялар көлемі, жолаушы айналымы, тұрғын үйлерді қолданысқа беру, облыс халқының қала және ауыл тұрғындарының саны, жұмыссыздық деңгейі, инфляцияның жалпы деңгейін сипаттайтын тұтыну бағаларының индексі секілді маңызды бағыттарда аймағымыздың 2023 жылғы қаңтар мен маусым айларындағы қорытындысы бойынша статистикалық мәліметтер баяндалды.
— Еш шегерімсіз және кәсіпкерлік қызметпен айналысатын шағын кәсіпорындарды есепке алмағанда, биылғы жарты жылдықта жұмыскерлерге есептелген орташа атаулы айлық жалақы 290 991 теңгені құрап, 2022 жылдағы қаңтар-маусымға қатысты алғандағы өсім қарқыны 114,6 пайызға тең болды. Нақты жалақы индексі 97,4 пайызды көрсетіп, Республиканың басқа өңірлерінің ішінде 2023 жылғы жарты жылдықтағы еңбекақы деңгейі бойынша біздің облыс 13-ші орынды иеленді,- деді Сертай Рыскелдіұлы.
