Биыл облыстың өңдеу өнеркәсібінде 19,1 млрд теңгені құрайтын 3 жоба жүзеге асты. Семей қаласында «ARX Minerals» ЖШС мыс өндіру және катодты мыс өңдеу зауыты, Көкпекті ауданында «Тассай балық» ЖШС балық өңдеу цехы және Жарма ауданындағы «SHARCEM» ЖШС цемент зауыты іске қосылып, 600-ден астам жұмыс орны ашылды.
Жадыра ТӨЛЕГЕНҚЫЗЫ,
«Semeı tańy»
Бұдан басқа жыл соңына дейін 11,9 млрд теңге сомасына тағы 4 жоба іске қосылып, 148 жұмыс орны ашылады деп күтілуде. Атап айтар болсақ, «ПК Семей цемент зауыты» ЖШС-де тік диірмен және цемент қаптамасының үшінші желісі, Семей қаласындағы «Yqylas-Invest» ЖШС-де ет жартылай фабрикаттар өндіру зауыты, Семей қаласындағы «ФИК Алел» АҚ-де металлургия зауытының учаскесіне арналған көмір десорбциясы және электролиз цехы, Бородулиха ауданында «Зейтенов» ЖК-де сүзбе цехы іске қосылмақ.
Ал келесі жылы облыста жалпы сомасы 66,8 млрд теңгені құрайтын 5 маңызды жоба іске асырылып, 378 жұмыс орны құрылады екен. Семей қаласында «Семей құрылыс материалдары» ЖШС-де фиброцементті қасбеттік плиталарды дайындау үшін өндірістік желіні енгізу, «Қазполиграф» ЖШС-де қағаз және картон бұйымдарын өндіру, «Qazaq Astyq Group» ЖШС-де күнбағыс майын құю және буып-түю желісімен тазарту цехын, Абай ауданында «METALL MINING» ЖШС-де Доре қорытпасына дейін құрамында алтын бар кенді қайта өңдеу бойынша цех, «Жарма ауданында «JM Crypto» ЖШС-де жел энергиясын түрлендіру үшін жалпы қуаты 200 МВт ЖЭС паркін салу көзделіп отыр.
— Экономиканың драйвері болатын облыстың перспективалы жобаларына жеке тоқталғым келеді. 2028 жылға дейін 2 мыңнан астам жұмыс орнын құра отырып, жалпы сомасы 1,2 трлн теңгеге екі ауқымды жобаны іске асыру күтілуде. NFC қатысуымен Аягөз ауданындағы Ақтоғай кен орнында «KAZ Minerals» ЖШС жаңа мыс балқыту зауытының құрылыс бастауды, сондай-ақ осы ауданда Қазақмыстың қатысуымен «Айдарлы» мыс кен орнын және «Жанар» жерасты су кен орнын өнеркәсіптік игеру, одан әрі «Айдарлы Прожект» ЖШС тау-кен байыту комбинатын салу жобалары жүзеге аспақ,- дейді Р.Ворошилов.
Аталған индустриалдық-инновациялық жобалар жүзеге асса, облыс экономикасының дамуына оң ықпал етері сөзсіз.
Сонымен қатар Абай облысында тоқтап тұрған кәсіпорындарды жандандыру бойынша нақты жұмыстар жүзеге асырылуда. Атап айтсақ, бұрынғы Кабель зауытының ғимараты жаңа қалыпқа еніп, «Лидер строй» құрылыс дүкеніне айналса, осы жылдың мамыр айында «Нұров» жеке кәсіпкерлігі Шугаев көшесінде орналасқан бұрынғы «Сем-Лада» ғимаратын жөндеп, «Балапарк» балалар ойын-сауық кешенін, ал маусым айында «Central 6388» ЖШС Ибраев көшесінде «JQ» отбасылық ойын-сауық орталығын ашты. Бұл инвесторлар бос тұрған ғимараттарды жаңарту үшін мемлекеттік қолдау алғанын айта кеткен жөн.
– «Евразия Агро Семей» ЖШС-нің Семей қаласында ет комбинатын салу жобасына мемлекеттік қолдаудың барлық шаралары көрсетілуде. Жер учаскесін бөлу үшін облыстың инвесторларды тарту жөніндегі Өңірлік үйлестіру кеңесімен жоба инвестициялық деп танылды,- деді басқарма басшысы Р.Ворошиов.
Жуырда басқарманың ұйымдастыруымен отандық тауар өндірушілердің жәрмеңкесі өтіп, нәтижесінде «Қазэлектромаш» ЖШС мен «AN Groups» ЖШС арасында шығарылатын өнімді жеткізу, «Промкомплект-Б» ЖШС мен «Силикат» ЖШС, «Сәт-Транс» ЖШС және «Sharcem» ЖШС арасында құрылыс материалдарын сатып алу бойынша келісімге қол қойылылыпты.
