Ақсуат ауданындағы «Көкжыра» өндірістік кооперативі — облысымыздағы іргелі шаруашылықтардың бірі. Аталған шаруашылық еңбеккерлері өткен жылды мол табыспен қорытындылады.
Өткен жылдың соңында кооператив басқармасының ұйымдастыруымен 2024 жылды қорытындылауға және жаңа жылды қарсы алуға арналған мерекелік іс-шара өтті. Салтанатты кешті алғы сөзбен ашқан шаруашылық басшысы Б.Сағынаев еңбеккерлерді Жаңа жыл мерекесімен құттықтап, қол жеткізген табыстары үшін барлық ұжым мүшелеріне алғысын білдірді.
Келесі кезекте сөз алған Ақсуат аудандық мәслихатының депутаты Д.Шідеров те шаруашылық еңбеккерлерін Жаңа жылмен құттықтап, жаңа табыстар тіледі. Халық қалаулысы кооперативте еселі еңбек етіп жүрген Мейірғазы Әділбеков пен Қайрат Бәкиевке Ақсуат аудандық мәслихатының төрағасы Ж.Оразғалиевтың атынан алғыс хат табыстады.
Кооперативтің басқарма мүшелері мал шаруашылығы саласында қыстың аязы мен жаздың аптап ыстығында аянбай тер төгіп жүрген азаматтарды марапаттап, құрмет көрсетті.
Атап айтқанда 100 саулықтан 100 қозы алған шопандар Серік Әпсейітов пен Мәулітбек Дүйсенбинге алғыс хат табысталып, сыйақыға бір-бірден тай берілді. Сол сияқты мал азығын дайындауда қажырлы еңбек етіп жүрген Б.Кенжебаев, Қ.Мұқаев, Т.Кенжебаев, Б.Боранбаев, Б.Абильмажинов, М.Әділбеков, Қ.Бакиев, С.Жамаділов, М.Молдаханов, Д.Есіркенов, Б.Түсіпханов сынды азаматтар да алғыс хатпен марапатталып, сыйақыға бір тай алды.
Ат үстінде дала төсінде күн-түн демей еңбектеніп, шаруашылықтың дамуына өздерінің сүбелі үлестерін қосып жүрген азаматтардың барлығына басқарма атынан алғыс хаттар табысталды.
Мерекелік жиында Көкжыра ауылы мәдениет үйі өнерпаздары еңбекші қауымның көңілін көтеріп, түрлі сайыстар өткізді. Жаңа жылдық кешке түрлі бейнеде киініп келген, жақсы өнер көрсеткен еңбеккерлердің барлығына ұйымдастырушылар атынан бағалы сыйлықтар табысталды.
Кеш соңында шаруашылық басшысы Б.Сағынаев әріптестеріне, аға буын өкілдеріне, сонымен қатар мерекелік шараның сән-салтанатымен жоғары деңгейде өтуіне атсалысқан Көкжыра мәдениет үйі ұжымы қызметкерлеріне ризашылығын білдірді.
Елдің ырысын еселеген шаруалар 2025 жылды да табысты аяқтаймыз деген сенімде. Ұжым еңбеккерлері «келер жылды да жетістіктермен аяқтайық» деп, тамаша көңіл-күймен тарқасты.
Хамза СӘТИЕВ
