Semeytany.kz — Семей қаласында Абай Құнанбайұлының 180 жылдығына арналған «Ұлағатты өлке – Абай, ұлылар мекені – Семей» атты рухани-мәдени іс-шара өтті. Жиынға қала және облыс басшылығы, ардагерлер мен зиялы қауым өкілдері, тұрғындар қатысты.
Салтанатты рәсім Абай театры алдында мемлекеттік әнұранмен ашылып, қала әкімінің міндетін атқарушы Бекжан Бапышев жиналғандарды мерекемен құттықтады. Ол ұлы ойшылдың мұрасын дәріптеу – әр ұрпақтың парызы екенін атап өтті.
Іс-шара Абай алаңында жалғасып, қатысушылар ақын ескерткішіне гүл шоқтарын қойып, тағзым етті. Абай облысы Ішкі саясат басқармасының басшысы Жарқын Жұмаділов бұл шараның ұлт руханияты үшін ерекше маңызын атап өтті.
Мерекелік жиын Абайдың мемлекеттік тарихи-мәдени және әдеби-мемориалдық музейінде «Абай әлемі және Яссауи» көрмесінің ашылуымен қорытындыланды. Көрмеде Абай мұрасы мен түркі руханияты арасындағы үндестік кеңінен таныстырылды.
