Semeytany.kz – Абай облысының әкімі Берік Уәли Семей қаласының сол жағалауындағы бірқатар нысандардың құрылыс жоспарымен танысып шықты. Аймақ басшысы бұл ауданды дамытуға басымдық берілетінін мәлімдеді.
Әкім бұрынғы «Пищевик» стадионы орналасқан аумақты аралап, мұнда Жекпе-жек сарайы мен Мұз сарайы салынатынын айтты. Бұл жобалар Мемлекет басшысының қолдауымен басталған «Абайға құрмет» акциясы аясында жүзеге асады. Ақтөбе облысы Абай облысына тарту ететін Жекпе-жек сарайы үш қабатты болмақ. Онда бокс, күрес, дзюдо және өзге де спорт түрлері бойынша жарыстар өткізуге мүмкіндік жасалады. Мұз сарайы да Заря шағын ауданында бой көтермек.
Берік Уәли қаланың даму жоспарына сәйкес сол жағалауда бірнеше маңызды инфрақұрылымдық нысан бой көтеретінін атап өтті. «Бұл ауданда халық тығыз орналасқандықтан, спорт және әлеуметтік нысандар салу қажет. Жаңа кешендер бұқаралық спортты дамытуға жол ашады», – деді әкім.
Сапар барысында өңір басшысы құрылыс салынатын Заря шағын ауданындағы жер телімдерін де қарап шықты. Қалалық әкімдік қаулысына сәйкес, бұл жерлер мемлекет мұқтажы үшін иеліктен шығарылған. Әкім үйлерді сүру және тазалау жұмыстары бас жоспарға сай жүргізілетінін, бос тұрған үйлердің орны бейберекет пайдаланылмайтынын айтты.
Молдағалиев көшесіндегі жол қозғалысын жеңілдету үшін жолақтар кеңейтілетіні де айтылды. «Қала тұрғындары арасында «сатып алынған үйлердің орны дұрыс пайдаланылмай жатыр» деген пікірлер бар екен. Бұл шындыққа жанаспайды. Бастапқы жоспар бойынша бұл жерде спорттық және қоғамдық ғимараттар салынады», – деді облыс әкімі.
