Semeytany.kz – Абай облысының әкімі Берік Уәли Жарма ауданының тұрғындарымен кездесіп, өңірдің әлеуметтік-экономикалық даму барысын баяндады.
Жиында алдымен Жарма ауданының әкімі Нұрлан Борсықбаев 2024-2025 жылдарға жоспарланған жұмыстар туралы есеп берді. Ал облыс әкімі ауданның даму көрсеткіштерімен қатар өзекті мәселелер мен жоспарланған жобаларды ортаға салды.
Облыс бойынша жалпы өңірлік өнім көлемі 4,3 пайыз өсіммен 3,2 триллион теңгеге жеткен. Инвестиция көлемі 575,4 миллиард теңгені құрап отыр, оның басым бөлігі жеке инвестиция. Ал бұл көрсеткіштің 9 пайызы ауыл шаруашылығына, 7,7 пайызы құрылысқа, 4,3 пайызы көлік саласына тиесілі.
Жарма ауданы бойынша шешімін күткен мәселелер де көтерілді. Атап айтқанда, аудандағы жылу желілерінің 68,6 пайызы тозған. Биыл Шуақ ауылындағы жылу жүйесін жөндеуге қаржы бөлініп отыр. Ауыз сумен қамту бойынша Қалбатау мен Жаңғызтөбе ауылдарында су жүйелері жаңғыртылуда. Сонымен қатар Сұлусары ауылындағы жоба қайта қаралып жатыр.
Ауданда 20 шақырымнан астам жол жөнделеді. Бұл жұмыстар Жаңғызтөбе – Жарық бағытындағы жол мен Қалбатау, Үшбиік ауылдарының көшелерін қамтиды. Білім беру саласында Жарма ауданындағы 15 мектепке ағымдағы жөндеу жұмыстары жүргізіліп, 7 мектепке жаңа пәндік кабинеттер сатып алынбақ.
Денсаулық сақтау саласында Қапай батыр ауылындағы медпункт жөнделіп, Шар қаласының ауруханасы жаңғыртылмақ. Спорт пен мәдениет саласында да бірқатар нысандар – Қалбатаудағы стадион мен бассейн, Жаңғызтөбедегі спорт модулі, Шар қаласындағы мәдениет үйі жөнделеді. Аудандық мәдениет үйіне жаңа музыкалық аппараттар алынатыны да айтылды.
Кездесу соңында тұрғындар жол, көпір, мектеп және әлеуметтік нысандарға қатысты өз сұрақтарын қойды. Облыс әкімі барлық мәселе назарда болатынын айтып, бірқатар жоба бойынша жобалық-сметалық құжаттар әзірленіп, тиісті бюджетке өтінім берілгенін жеткізді.
«Жарма ауданы тоғыз жолдың торабында орналасқан. Мұнда даму әлеуеті зор. Үшбиік ауылындағы көпір – ең өзекті мәселе. Қайта салу үшін Көлік министрлігіне өтінім берілді. Қалбатауда бала саны көп болғандықтан, жаңа мектеп салу жоспарда. Бұл жұмыстар жүйелі түрде атқарылады», – деді облыс әкімі Берік Уәли.
