Semeytany.kz – Абай облысында аудан және қала әкімдіктерінің жұмысы енді жаңа рейтингтік жүйе арқылы бағаланады. Бұл туралы облыс әкімі Берік Уәлидің төрағалығымен өткен әкімдік отырысында мәлім болды.
Жаңа жүйе аясында әр әкімдікке нақты индикаторлар бекітілген. Жұмыс тиімділігі тоқсан сайын сараланып, арнайы рейтинг қалыптастырылады. Аймақ басшысы бұл тәсіл облыстың әлеуметтік-экономикалық дамуына тың серпін беретініне сенімді.
2025 жылдың алғашқы жартыжылдығы бойынша жасалған рейтинг нәтижесінде Үржар ауданы, Курчатов қаласы мен Абай ауданы үздік үштікке енген. Ал экономикасы мықты саналатын Аягөз, Бородулиха мен Бесқарағай аудандары рейтингтің төменгі сатысында қалып қойды. Осыған байланысты облыс әкімі аталмыш аудандар әкімдерінің салаға жауапты орынбасарларына тәртіптік шара қолдануды тапсырды.
Айта кетейік, жартыжылдықтың қорытындысы бойынша облыс экономикасы 3,7% өсім көрсеткен. Көлік, құрылыс, байланыс, ішкі сауда және ауыл шаруашылығы салаларында айтарлықтай оң көрсеткіштер тіркелген.
