Semeytany.kz — Абай облысының табиғи ресурстар және табиғат пайдалануды реттеу басқармасына Марат Теміржанов басшы болып тағайындалды. Тағайындау облыс әкімінің өкімімен жүзеге асты.
Басқарма өңірдегі орман және жануарлар дүниесін қорғау, су ресурстарын ұтымды пайдалану, ерекше қорғалатын табиғи аумақтарды дамыту және экологиялық бақылауды үйлестіреді.
Жаңа басшының алдында орман өртінің алдын алу, су тапшылығы тәуекелдерін азайту, заңсыз ағаш кесуге қарсы күрес, сондай-ақ рұқсат беру рәсімдерінің ашықтығын күшейту секілді міндеттер тұр. Теміржанов қызметіне кірісті.
Өмірбаяны
Марат Қапарұлы Теміржанов 1972 жылы 1 қаңтарда Абай облысы Көкпекті ауданы Ұзын Бұлақ ауылында дүниеге келген. 1997 жылы «Семей» мемлекеттік университетін «Зоотехния» мамандығы бойынша, 2009 жылы Шәкәрім атындағы Семей мемлекеттік университетін «Экономика» мамандығы бойынша тәмамдаған.
Еңбек жолы
Еңбек жолын 1993 жылы Көкпекті ауданы Үлгілімалшы совхозында ветеринар технигі болып бастаған. Әр жылдары «Аббат» ЖШС-де, телекоммуникация саласында, ауыл шаруашылығы және қаржы ұйымдарында еңбек етті.
2006-2009 жылдары Көкпекті аудандық ауыл шаруашылығы бөлімінде бас маман, 2009-2010 жылдары Белое ауылдық округінің әкімі, 2010-2015 жылдары Көкпекті аудандық ауыл шаруашылығы және ветеринария бөлімінің басшысы, 2015-2025 жылдары Көкпекті ауданы әкімінің орынбасары болды.
2025 жылдың ақпан айынан бастап Бородулиха ауданы әкімінің орынбасары қызметін атқарды.
2025 жылғы 18 тамыздан бастап Марат Қапарұлы Теміржанов Абай облысының табиғи ресурстар және табиғат пайдалануды реттеу басқармасының басшысы лауазымына тағайындалды.
