Ауданның әлеуметтік-экономикалық әлеуетін арттыру мақсатында биылғы жылы Тарбағатай ауданында ежелден қалыптасқан мал шаруашылығымен қатар, суармалы егістік жерді айналымға көбірек қосып, егіншілік кәсіпті дамытуға да ерекше көңіл бөліне бастады. Басқаны айтпағанның өзінде, биылғы жылы ауданда азық-түлік қауіпсіздігін қалыптастырудың негізгі көздерінің бірі — картоп өсіруді мықтап қолға алу жоспарлануда.
{jcomments on}Биыл аудан бойынша 700 гектар жерге картоп егіледі деп күтілуде. Әрине, осынша алқапқа дер кезінде тұқым отырғызып, оның өнімін күзде шашпай-төкпей жинап алу оңай шаруа емес. Мамандардың есебіне қарасақ, аудан шаруашылықтарында картоп тұқымын егетін, картоп қазып алатын оншақты ғана техника бар екен. Мұндай жетіспейтін күш-қуатпен қыруар істі сапалы атқару мүмкін емес. Бұл мәселе аудан басшыларын, шаруашылық мамандарын, кәсіпкерлерді ойландырмай жүрген жоқ. Аудан әкімі Ділдабек Оразбаев шаруа қожалықтары басшыларымен, диқандармен кездесулерде, ауылдарда өткен жылдық есеп беру жиындарында картоп егетін техниканы ертерек сайлап алу керектігін, оны алыстан іздемей-ақ, Екпін ауылындағы өнертапқыш азамат Мейрамғазы Қапановқа жасатып алуға да болатындығын сан мәрте ескерткен еді.
Осы мәселеге байланысты біз аудандық кәсіпкерлік бөлімнің басшысы Әсет Аханжановқа жолығып әңгімелестік. Шағын және орта бизнесті дамыту саласына қосқан елеулі еңбегі үшін таяуда ғана республикалық бизнес-рейтинг ұйымдастыру комитетінің шешімімен «Еңбек сіңірген мемлекеттік қызметкер» орденімен марапатталған Әсет Аханжанов: «Көктем егісіне дайындық әңгімесін Мейрамғазымен сөйлесудан бастайық»,- деп, бізді Екпін ауылына алып барды.
Техника тілін бұрынғы Амангелді совхозында атақты тракторшы болған, жоңышқа және жүгері өсірумен де атағы шығып, сыйлыққа талай рет ат мінген әкесі Құрманғазы Қапановтан үйренген Мейрамғазы — қазірде трактормен шөп тиегіш «КУН-10» техникасын, картоп егетін және оны қазып алатын құрылғыларды қолдан жасайтын бірден бір маман. Бесінші сынып оқып жүрген кезінде-ақ әкесімен бірге техника тұтқасына жармасып, жұмысқа араласқан Мейрамғазыға училище немесе техникумда оқудың да қажеті болмапты. Бәрін өз бетімен талаптанып, үйреніп алған. Оның үйін кішігірім «МТС» десе болады. Темір жонатын, тесетін, кесетін, дәнекерлейтін станогы бар. Қазір трактор моторын, басқа тетіктерін жөндеп беріп, ауылдастарының алғысын алып жүр.
— Әкем Құрманғазы, ағайым Серікқазымен бірге жоңышқа да суарыстым. Сол жылдыры 250 гектар жоңышқаның әр гектарынан 7,5 тонна жоңышқа алатынбыз. Техникаға жастайымнан құштар болдым. Жылда осы кәсіпке екі-үш баланы үйретемін. Бірақ тұрақтамайды, қалаға кетіп қалады. Көктем, жаз мезгілдерінде жұмыс көп, картоп егетін төрт құрылғы жасадым. Қолма-қол алып кетті. Әлі де сұраныс көп. Ауыл-аймақтағы ағайындар картоп егетін саймандары сынса, маған әкеліп жөндетіп алады. «Бұрын қайта-қайта сына беретін еді, сіз жөндеген соң, бүлінбейтін болды»,- деп, алғыстарын айтып кетеді. Қабанбай ауылының екі азаматы екі «КУН-10» қондырғысын жасатып алды. Картоп егетін сайман жасап бер дегендер көп. Қытайдың картоп қазатын қарапайым құрылғысын да көрдім. Оны үлкейтіп, бір жүргенде екі қатарға егілген картоп жүйесін бірақ қазатын етіп жасауға да болады екен,- дейді өнертапқыш Мейрамғазы Қапанов.
Хамза СӘТИЕВ,
«Семей таңы»
