Semeytany.kz — Облыс әкімі Берік Уәлидің төрағалығымен өткен кеңейтілген аппараттық кеңесте «Ауылдық денсаулық сақтауды жаңғырту» ұлттық жобасы аясында салынған медициналық-санитарлық алғашқы көмек нысандарының жай-күйі талқыланды. Жиында Құрылыс басқармасының басшысы Шыңғыс Риаханов, Денсаулық сақтау басқармасының басшысы Талғат Молдабеков және санитариялық-эпидемиологиялық бақылау департаментінің басшысы Нұржан Ноғайбаев баяндама жасады.
Ұлттық жоба 2023–2025 жылдарға жоспарланған үш кезеңнен тұрады. Алғашқы кезеңде 65 алғашқы медициналық-санитарлық көмек нысанын салу көзделген. Екінші кезең Аягөз аудандық ауруханасына екі жапсарма құрылысты және Үржар аудандық ауруханасында инсульттік орталықты тұрғызуды қамтиды. Үшінші кезең мамандармен қамтамасыз етуге бағытталған.
Бірінші кезең бойынша 65 нысанның 62-сі пайдалануға берілді. Үржар ауданында 50 келушіге есептелген, 10 орындық күндізгі стационары бар амбулатория, сондай-ақ Ақсуат ауданындағы Аққала мен Қожагелді ауылдарындағы медициналық пункттер жыл соңына дейін іске қосылмақ.
Екінші кезең шеңберінде Аягөз аудандық ауруханасының реанимациялық бөлімшесіне арналған жапсарма құрылысы аяқталды. Қазіргі уақытта МРТ құрылғысына арналған жапсарма салу басталды. Үржар аудандық ауруханасындағы инсульттік орталықтың құрылысы да жүріп жатыр.
Аймақ басшысы жауапты орынбасары Серік Төленбергеновке және Құрылыс басқармасына салынған нысандарды қабылдауға қажетті құжаттарды жедел рәсімдеуді тапсырды. Мемлекеттік сәулет-құрылыс бақылау басқармасына аудан және қала әкімдіктерімен бірлесіп, анықталған кемшіліктерді жою барысын қатаң бақылауда ұстау жүктелді. Денсаулық сақтау басқармасы құжаттаманы толықтырып, жұмыс бойынша апта сайын есеп беріп отырады.
