Semeytany.kz — Абай облысы бойынша Экономикалық тергеп-тексеру департаментінің қызметкерлері «Заң және Тәртіп» қағидасы аясында әскери полиция басқармасының жеке құрамына түсіндіру кездесуін өткізді.
Шарада экономика мен киберкеңістіктегі қауіптер кеңінен талқыланды. Мамандар қаржы пирамидаларының негізгі белгілерін, олар анықталған жағдайда әрекет ету тәртібін, лудоманияның азаматтардың қаржылық жағдайына тигізетін залалын, сондай-ақ интернет-алаяқтықтың кең таралған түрлері мен одан қорғану жолдарын түсіндірді.
Абай облысы бойынша Экономикалық тергеп-тексеру департаментінің аса маңызды істер жөніндегі жедел уәкілі Мәдина Намазакова алдын алу шараларының маңызын атап өтті. Оның айтуынша, қаржы пирамидаларына жоғары табысқа уәде беру, нақты өнім не қызметтің болмауы, жаңа салымшыларды тартуға итермелеу, қаражатты қайтару шарттарының түсініксіздігі және қаржылық қызметке рұқсат беретін лицензияның жоқтығы тән. Мұндай жобалар көп жағдайда әлеуметтік желілер, мессенджерлер және беделі бар жеке тұлғалар арқылы таралады.
Департамент өңірдегі қаржылық қауіпсіздікті нығайту бағытында жүйелі профилактикалық жұмыстарды жалғастырып келеді. Азаматтарға күмәнді инвестициялық ұсыныстардан сақ болып, күдік тудырған ақпарат бойынша құқық қорғау органдарына жүгіну ұсынылды.
