Semeytany.kz — Семей қаласындағы Жеңіс саябағында ҚР ҰҚК Шекара қызметінің Абай облысы бойынша департаменті «Күз-2025» әскерге шақыру науқанының ресми ашылуын өткізді. Бұл – өңір жастарын әскерге шығарып салуға арналған алғашқы салтанатты рәсім.
Салтанатты шараға облыс әкімінің орынбасары, облыстық әскерге шақыру комиссиясының төрағасы Мейірлан Раханов, Абай облысы қорғаныс істері департаментінің бастығы полковник Руслан Омаров, ҚР ҰҚК Шекара қызметі департаменті бастығының орынбасары полковник Анвар Рахматуллаев, тәрбиелік, идеологиялық және кадрлық жұмыстар басқармасының бастығы подполковник Айдын Чуримбаев, «Застава тарландары» ардагерлер бірлестігінің облыстық филиалының төрағасы, запастағы подполковник Анарбек Еркешов, «Аналар жүрегі» сарбаз аналар комитеті облыстық филиалының жетекшісі Айнур Татерова және сарбаздардың ата-аналары қатысты.
Сөз алған Мейірлан Раханов әскерді «ер жету мектебі» деп атап, жастарға абыройлы қызмет тіледі. Полковник Руслан Омаров әскер қатарында тәртіп пен бірлікке үйрететінін айтса, полковник Анвар Рахматуллаев шекара қызметіндегі борыштың жоғары жауапкершілік екеніне тоқталды. Ардагер Анарбек Еркешов жас буынға сәттілік тілеп, дәстүр сабақтастығын атап өтті.
Шара барысында Мемлекеттік Ту көтеріліп, Қорғаныс министрлігінің әскери оркестрі патриоттық әуендер орындады. «Күз-2024» шақырылымында борышын өтеп жүрген ефрейторлар Алдияр Құсаинов пен Мерей Құмарғажы тәжірибесімен бөлісіп, ізін жалғайтындарға ақ жол тіледі. Соңында ҚР ҰҚК Шекара қызметінің қатардағы жауынгері Ерасыл Төлеш патриоттық ән шырқап, жас сарбаздарға рух сыйлады.
Алдағы күндері әскерге аттанатын жастар белгіленген жоспарға сай медициналық және іріктеу кезеңдерінен өтіп, бөлімдерге жіберіледі.
