Тарбағатай ауданының әкімі Ділдәбек Оразбаев пен аппарат қызметкерлері үшін өткен апта да қарбалас істерге толы болды. Дүйсенбіде әкімдіктің кезекті мәжілісі өтті. Онда “Ауданның 2014 жылғы әлеуметтік-экономикалық даму қорытындылары туралы” аудандық экономика және бюджеттік жоспарлау бөлімінің басшысы А.Аққазиннің баяндамасы тыңдалды. Жиында сондай-ақ “Тарбағатай ауданының ҮИИД мемлекеттік бағдарламасының бірінші кезеңін іске асыру қорытындылары және 2015-2019 жылдарға арналған индустриялық-инновациялық даму жоспары туралы” аудандық кәсіпкерлік бөлімінің басшысы Ә.Аханжанов, “Жайлау, “Сыбаға”, “Құлан” және “Алтын асық” бағдарламаларының орындалуы, құс шаруашылығын дамыту және лизингке ауыл-шаруашылық техникаларын алу, көктемгі егістікке тұқым қорын қалыптастыру барысы туралы аудандық ауыл шаруашылығы бөлімінің басшысы М.Қайырбеков, “Аудандық тұтынушылардың құқығын қорғау басқармасының 2013-2014 жылдардағы атқарған жұмыстары және алда тұрған міндеттері туралы” аудандық тұтынушылардың құқығын қорғау басқармасының басшысы А.Жұмай, “Егістікпен айналысатын шаруа қожалықтарына, қолданыстағы заңдылықтарға сәйкес, конкурстық негізде жерді табыстау барысы туралы” аудандық жер қатынастары бөлімінің басшысы Е.Жанпейісов хабарлама жасады. Жиынды аудан басшысы Ділдабек Тәжібайұлы өзі қорытындылап, күн тәртібіндегі мәселелер бойынша алда тұрған міндеттерге жан-жақты талдау жасады.
{jcomments on}Сейсенбіден бастап аудан басшысы ауылдарды, ондағы өндіріс орындарын, базарларды, халыққа әлеуметтік қызмет көрсететін мекемелерді, мал бордақылау алаңдарын аралап көру сапарын жалғастырды. Қасына әр саланың тиісті басшыларын ерткен аудан басшысы Д.Оразбаев Қызылкесік, Жеті-арал, Көкжыра ауылдарына барды. Мысалы, Жетіарал ауылындағы жеке фермер Дәулетхан Нұрхановтың мал бордақылау алаңын аралап көруінің өзі осы өңірдегі мал шаруашылығымен айналысатын азаматтар үшін есте қалатындай, тағылым алатындай әсерлі болды. «Жүз рет естігеннен бір рет көрген артық» деген халық даналығын ескерген ауыл әкімі Серік Қажиекберов «әкім осында келеді, әңгіме өткізеді» деп шаруаларды әдейі жинап қойса керек.
Мал семірту алаңындағы әңгімені аудан әкімі Елбасы Н.Назарбаевтың Ақордада Үкіметтің кеңейтілген отырысында сөйлеген сөзінің маңыздылығын айтудан бастады. Онда «Нұрлы жол» бағдарламасы қаржы дағдарысының алдын алуға арналған іс-шара екені, тиімділігі іс жүзінде дәлелденген «Жұмыспен қамтудың жол картасы – 2020» бағдарламасын сақтаудың қажет-тілігі айтылғанын қуанышты жаңалық ретінде мәлімдеді. Сондықтан жерге иелік етемін, жұмыс істеймін, мал бордақылаймын деген азаматтарға бұдан былай да несие беріліп, жағдай жасалатынын айтты. Әр ауылда малға берілетін жем, тұз тұрақты түрде сатылатын дүкендер салу міндеті қойылып отырғанын, келешекте Ақсуатта мал сойып, одан он бір түрлі өнім шығаратын зауыт салынатынын, мұның өзі малшылардың еңбек белсенділігін арттыратын зор мүмкіндік екенін мәлімдеді.
Д.Нұрхановтың мал бордақылау алаңы 80 бас өгіз семіртуге арналған екен. Енді ол жемшөпті малға майдалап турап беретін қондырғы орнатуды мақсат етіп отыр. Осы ауылдағы жеке шаруа қожалығының иесі Ошан Айқын да суармалы жер иеленсем, егін, жоңышқа, бау-бақша өсіріп, осы сияқты мал семірту ісін қолға алсам деген арман-мақсаты бар екенін айтты. Мал бордақылау алаңындағы басқосуда шаруалар өздерін толғандырып жүрген сауалдарын қойып, оларға аудандық ауыл шаруашылығы саласының білікті мамандары Мерей Қайырбеков, Серік Қонысбаев, Дүйсембек Төлембаев және басқалар кәсіппен айналысудың заңдылықтарын түсіндірді.
Хамза СӘТИЕВ,
«Семей таңы»
