Semeytany.kz – 5 қазан күні Алматы облысы бойынша департаменттің медициналық қамтамасыз ету бөлімінде Шекара қызметінің қатардағы сарбазы Нұрасыл Ануар көз жұмды. Оқиға бойынша ҰҚК сотқа дейінгі тергеу тіркелгенін және қызметтік тексеріс тағайындалғанын хабарлады.
Нұрасыл Ануар мерзімді әскери қызметке 2025 жылдың 27 қыркүйегінде шақырылып, Қарасай шекара бөлімінде қызмет атқарған. Туыстарының айтуынша, әскерге өз аяғымен кеткен жігіт арада бір апта өткенде табытпен үйіне әкелінген.
Алдын ала қорытындыда әскери қызметкердің өліміне менингококцемия себеп болғаны айтылған. Алайда марқұмның жақындары бұл нұсқаға күмән келтіріп, объективті әрі жан-жақты тергеу жүргізуді талап етіп отыр. Туыстары Нұрасылдың әскерге дейін дені сау болғанын, оның ауырып жатқаны туралы ешкім хабарламағанын жеткізді. Сонымен қатар, олар марқұмның денесін көруге де қиындық болғанын айтады.
Ұлттық қауіпсіздік комитетінің Шекара қызметі марқұмның туыстары мен жақындарына көңіл айтты. Қазіргі уақытта факті бойынша сотқа дейінгі тергеу жүргізіліп, қызметтік тексеріс басталды.
