Semeytany.kz — Аягөз қаласында жеке меншік «Шұғыла-Б» балабақшасы ашылып, 90 бүлдіршінге дейін қабылдайтын жаңа нысанның тұсауы кесілді.
Жаңа мекемеде төрт топ жұмыс істейді: екеуі – ортаңғы, екеуі – ересектер тобы. Балабақша 1 жас 6 айдан 5 жасқа дейінгі балаларды қабылдайды. Ашылуға орай Аягөз аудандық білім бөлімінің басшысы Нұрғали Әзімбаев құттықтау сөз сөйлеп, ұжымға сәттілік тіледі.
Балабақша «Абай облысы білім басқармасының 2023-2029 жылдарға арналған жол картасының» «Балабақша – жайлы мекенім» бағыты аясында іске асырылды. Мұнда Монтессори әдістемесі, ерте дамытудың инновациялық бағдарламалары және үш тілде білім беру элементтері қолданылады. Сабақтар балалардың жас ерекшелігіне сай дамытушы ойындар арқылы өтеді.
Мекеме заманауи құрал-жабдықтармен қамтылған: интерактивті панельдер, сенсорлы үстелдер, қауіпсіз резеңке төсемі бар ашық ойын алаңы, жылы әрі жайлы интерьер қарастырылған. Жоба нәтижесінде 29 жаңа жұмыс орны ашылды.
Қорытындылай келе, бұл балабақша – соңғы екі жылдағы аудан бойынша ашылған жаңа мектепке дейінгі ұйымдардың бірі. Аягөз ауданында балабақша кезегінде 418 бала тұр.
