Semeytany.kz — Абай облысының Аягөз ауданындағы №5 мектептің 7-сынып оқушысы Әлихан Салихан ұлттық қолөнерге ерекше ынта танытып, қамшы өрудің 15 түрін меңгерген.
Жас өрен қатарластары гаджетке көңіл бөлген кезеңде ата-баба мұрасын жаңғыртып жүр. Ол дойыр, өрме, сегіз өрім, тобылғы сапты, шынжыр баулы, алақанды және сәндік қамшы секілді үлгілерді өз қолымен жасап шығарады. «Қамшы — жай ғана бұйым емес, бұл — тарих, тәрбие және рух. Әр өрімді жасаған сайын ата-бабаларымыздың өмір салтын, батырлық болмысын көз алдыма елестетемін», — дейді Әлихан.
Бала күнінен әкесінің ісіне қызығып, ісмерлікке ден қойған ол бүгінде тек өрумен шектелмей, қамшының шығу тарихын, аймақтық ерекшеліктерін зерттеп келеді. Дәстүрлі тәсілдерді қазіргі қажеттілікке сай бейімдеп, жаңа үлгілерді де ұсынып жүр. «Мақсатым — өз тәжірибем арқылы замандастарыма үлгі болып, ұлттық мұраға құрметті арттыру», — дейді жас шебер. Жетекшісі — Мұхит Бұршақбаев.
