Қарабұжыр қарт Калба қойнауын мекендеген елдің қазыналы қарттары да, қасиетті аналары да бар екені әлімсақтан әмбеге аян, жалпақ жұртқа жария. Бүгінгі күнде жүз жасқа қараған қарияларымыз отбасының ұйытқысына, шаңырақтың қасиетіне, елдігіміздің берік тұтқасына айналған. Көкпекті ауылында тұратын Бағила әжеймен кездескенде, 95 жастың төрінде отырса да, өзін сергек ұстайтын қағажақтай ғана кейуана туралы осындай ойға келдік.
{jcomments on}Шындығында да, аздап құлағының ауырлау еститіні болмаса, бойын тік ұстап отырған әжей, өзінің қазіргі жас мөлшеріне қарағанда, әлдеқайда тың көрінеді. Отағасы марқұм Ахметолда екеуі тату-тәтті өмір сүріп, отбасында алты ұл, бір қыз тәрбиелеген. Бүгінгі күні ұрпақтарынан көрген немере-шөберелер ортасында құрметке бөленіп, отбасының ұйытқысы, алтын діңгегі болып отырған Бағила әжеміз — бақытты жан.
Ол кісінің айтуынша, 1920 жылы Көкпекті өңірінің Егінбұлақ ауылында жарық дүние есігін ашқан Бағила Данақызының балалық және жастық шағы аумалы-төкпелі қиын кезеңдерге сәйкес келген. Әкесі Дана мен анасы Рыстыбаладан Рақым әжеміздің ағасы соғыста елін қорғауға аттанады. Қиямет-қайым соғыс жылдары көппен қатар тылдағы ерлер атқаратын ауыр жұмыстардың адам төзгісіз ауыртпалығына төтеп беріп, қиындықтарды жеңе білген. Техника деген жоқтың қасы болған сол жылдары аяққа теріден тігілген шәркей киіп, жаяу мал бағу, егін егу, оны қолмен орып бастыру, шал-ғымен шөп шабу, өгіз жегіп, тырнауышпен шөп жинап, мая салу секілді ауыр да азапты жұмыстармен шыныққан жастық шағы көрген түстей, сағымдай болып өте шығыпты.
— Көретін кино, тыңдайтын радио жоқ кезде ауыл жастары өз күштерімізбен концерт қоятынбыз. Сара, Бибі, Бижамал, Пәрзана атты дос құрбыларыммен бірге «Қыз Жібек» пьесасында ойнағаным — жарқын естеліктердің бірі, — деген көргені мол қария, — қазіргі таңда кенже ұлым Ерланым мен келінім Сара менің еркелігімді қабақ шытпастан көтеріп, сый-құрметке бөлеп отыр, олардан сүйген қос немерем Талғат пен Жібек — менің қос қанатым, жанымды елжіретер еркелерім, — дейді әңгімесін аяқтай келе.
Әжейдің жас кезінде күш-қайратының ер-азаматтардан кем соқпағанын ол кісінің азулы қасқырды, түлкі мен борсықты қалай соғып алғаны туралы айтқан әңгімесінен байқадық. Мүмкін, ұзақ өмір сүруінің құпиясы да ол кісінің төзімділігі мен қажырлылығында, мінезінің ақжарқындығы мен пейілінің кеңдігінде жатқан шығар. Келіні Сара Қайсақызының айтуынша, әже әлі күнге үй шаруасына да мығым көрінеді. Түскі асты пісіріп, ет асып, сорпа қайнатып қояды екен. Жыл сайын Наурыз мейрамына балалары анасын құттықтап келерде, ерекше әбігерленіп, наурыз көже дайындауға да келініне көмектеседі екен. «Қарты бар үйдің қазынасы бар» демекші, осындай ақылгөй, тілеуші қарттарымыз барда, өскелең ұрпақ қай жағынан болсын ғибрат алары еш шүбә келтірмейді. Олардың өмір жолдары өнеге, еңбек жолдары үлгі боларлық жандар.
Бақыт МҮЛІКОВА, зейнеткер-ұстаз,
Қайрат МӘЛҒАЖДАРОВ, Көкпекті ауданы.
