Қазақстан халқы Ассамблеясының 20 жылдық мерейтойына орай, Мәскеу мемлекеттік экономика, статистика және информатика университетінің Өскемендегі филиалында «Еуразиялық интеграция: қазіргі күйі мен даму келешегі» тақырыбында дөңгелек үстел өткізілді.
{jcomments on}Аталмыш білім ордасының Мәскеу, Белорусь, Армения филиалдарын онлайн режимде байланыстырған дөңгелек үстел ШҚО ҚХА хатшылығы мен Мәскеу мемлекеттік экономика, статистика және информатика университетінің ұйымдастыруымен өтті. Жиынға Шығыс Қазақстанның ҚХА мүшелері қатысты.
Дөңгелек үстел барысында ҚХА мүшелері мен университет өкілдері бірыңғай экономикалық кеңістікті құрудың өзектілігі мен даму келешегінің құрылымдық, инновациялық, инвестициялық бағыттарын талқылады. ШҚО ҚХА хатшылығының меңгерушісі Еркінбек Аязбаев Еуразиялық интеграцияның даму келешегін Қазақстан ұстанған ынтымақ үлгісімен байланыстырды: «Біздің Елбасымыз айтқандай, ел ішіндегі бейбітшілік пен келісім – ел экономикасының дамуының кепілі. Қазіргі уақытта достық пен бірліктің үлгісін көрсеткен Қазақстан ЕЭО аясындағы елдермен өзара ынтымағын нығайтуда. Осыдан 20 жыл бұрын жоспарланып, бүгінгі күні негізі қаланған Еуразиялық экономикалық одақтың маңызын ел терең түйсініп келеді. Оның өміршеңдігі одақтағы елдердің ынтымағы, келісімі мен тең құқықтылығында болмақ», – деді Е.Аязбаев.
Бұдан кейін сөз сөйлеген университет профессорлары ТМД және ЕЭО елдерінің мәдени және білім саласындағы байланысын нығайтудың маңызын айтып өтті. Сондай-ақ Мәскеу мемлекеттік экономика, статистика және информатика университетінің Өскемендегі филиалының директоры Алина Алипова аталмыш білім ордасы ЕЭО елдері өкілдерінің еуразиялық интеграцияны талқылауда диалогтік алаң болуға дайын екендігін жеткізді.
ШҚО Ақпаратық орталығы.
