Semeytany.kz — облыс әкімі Берік Уәлидің төрағалығымен өткен кеңейтілген аппараттық кеңесте өңір аумағындағы тарихи-мәдени ескерткіштердің жай-күйі мен оларды қорғау бағытындағы жұмыстар талқыланды.
Жиында мәдениет, тілдерді дамыту және архив ісі басқармасының басшысы Жанжігіт Омархан баяндама жасап, атқарылған істер мен алдағы жоспарларды таныстырды. Қазіргі таңда Абай облысының мемлекеттік тізіміне 417 тарихи-мәдени ескерткіш енгізілген. Оның 404-і жергілікті маңызы бар нысандар болса, 13 ескерткіш республикалық деңгейде қорғалады. Тізімге қала құрылысы мен сәулет, монументалды өнер, археология, сакралды нысандар және кешенді ансамбльдер санатындағы орындар енген.
Ескерткіштерді қорғау мен қалпына келтіру мәселелері бойынша 2025 жылы облыстық комиссия 6 рет бас қосып, бірқатар нысандарды алдын ала есепке алу, мемлекеттік тізімге енгізу және ғылыми-реставрациялық жұмыстарды бекіту жөнінде шешімдер қабылдаған.
Өңірде бірнеше маңызды ғылыми-реставрациялық жоба жүзеге асқаны айтылды. Семей қаласындағы бұрынғы көпес Мусиннің диірмені қайта жаңғыртылып, бүгінде Pana Unique Semey қонақ үй кешені ретінде пайдалануға берілген. Сонымен бірге В. Чернышевский атындағы №1 мектеп, Губернатор үйі, қос мұнаралы мешіт, көпес Сахно үйі, Ф. Достоевский атындағы әдеби-мемориалдық музей ғимараттарында қалпына келтіру жұмыстары жүргізілген, кей нысандарда жаңғырту жалғасып жатыр.
Археология саласында да жұмыс бар. Ақсуат ауданындағы Елеке Сазы алқабында қазба жұмыстары қолға алынып, ерте темір дәуіріне жататын құнды артефактілер табылып, музей қорына тапсырылған.
Аймақ басшысы құнды жәдігерлердің көшірмелерін музейлерге орналастыруды, археологиялық зерттеулерді жүйелі жалғастыруды және тұрғындар арасында тарихи мұраны қорғауға қатысты түсіндіру жұмыстарын күшейтуді тапсырды. Берік Уәли тарихи-мәдени ескерткіштер өңірдің рухани өзегі ғана емес, туристік әлеуетті арттырып, әлеуметтік-экономикалық дамуға да ықпал ететін маңызды фактор екенін атап өтті. Сондықтан ескерткіштердің сақталуын тұрақты бақылап, техникалық жай-күйін бағалап, ғылыми негізде қалпына келтіру ортақ міндет екені айтылды.
