Semeytany.kz — бүгін Абай облысының әкімі Берік Уәли Семей қаласындағы Невзоровтар отбасы атындағы бейнелеу өнер музейінде ұйымдастырылған «Ұлы дала қазынасы» көрмесін тамашалады.
Көрме көшпелі өркениеттің асыл мұрасын кеңінен қамтыған мәдени жоба ретінде көпшілік назарына ұсынылып отыр. Экспозицияға Шығыс Қазақстан облыстық тарихи-өлкетану музейінің қорынан әкелінген археологиялық жәдігерлер қойылған. Бұл құнды дүниелер 2016 жылдан бері еліміздің жетекші археологтары Зейнолла Самашев пен Әбдеш Төлеубаев Абай және Шығыс Қазақстан облыстары аумағында жүргізіп келе жатқан ғылыми-зерттеу жұмыстарының нәтижесінде табылған.
Экспозицияда Елеке сазы, Тасарық, Шілікті, Берел, Ақжайлау, Қарақаба секілді археологиялық ескерткіштерден алынған бірегей артефактілер бар. Мамандардың айтуынша, көшпенділер дәуіріне тән бұл жәдігерлер сол кезеңдегі өркениет деңгейін, сондай-ақ көне шеберлердің зергерлік өнердегі жоғары қолтаңбасын айқын көрсетеді. 2016-2025 жылдар аралығындағы зерттеулер барысында 28 мыңнан астам артефакт табылып, облыстық тарихи-өлкетану музейінің қорын толықтырған.
Көрме төріне тарих ғылымдарының докторы Зейнолла Самашев пен тарих ғылымдарының кандидаттары Қ.Ахметжан және Қ.Алтынбеков жасаған ғылыми-тарихи реконструкциялар да қойылған. Соның ішінде соңғы жылдардағы ірі жаңалықтардың бірі ретінде Абай облысы Ақсуат ауданындағы Елеке сазы қорымынан табылған «Алтын адам» ерекше аталады. Жәдігер б.з.б. VIII ғасырға жататыны көрсетіліп, қорымның бұзылмай сақталуы ақсүйек әулеттен шыққан бозбаланың жерлеу киімі мен қару-жарағын дәл қалпында жаңғыртуға мүмкіндік берген. Сондай-ақ Елеке сазы қорымындағы Қаған мәдени-мемориалдық кешенінен табылған VIII ғасырға жататын «Тақта отырған Қаған» мен Үржар ханшайымының реконструкциясы да келушілердің қызығушылығын арттырды.
Көрмені аралаған аймақ басшысы ұсынылған жәдігерлердің тарихи әрі ғылыми маңызына тоқталып, мәдениет саласына Абай облысына қатысты ескерткіштердің көшірмелерін жасап, оларды жергілікті музейлерге орналастыру бағытындағы жұмысты күшейтуді тапсырды.
Өңірде тарихи нысандарды сақтау және қалпына келтіру жұмыстары да қатар жүргізіліп келеді. Былтыр Семей қаласындағы бұрынғы көпес Мусиннің диірмені ғимараты Pana Unique Semey қонақ үй кешені ретінде жаңғыртылып, пайдалануға берілді. Сонымен бірге В.Чернышевский атындағы №1 мектеп, Губернатор үйі, қос мұнаралы мешіт, көпес Сахно үйі және Ф.Достоевский атындағы әдеби-мемориалдық музей ғимараттарында реставрациялық жұмыстар атқарылып, кейбір нысандарда жаңғырту жалғасып жатыр.
