Соғысқа қатысып, туған жеріне аман—есен оралған соң халық шаруашылығы салаларына белсене араласып, жемісті еңбек еткен ағаларымыздың бірі – Тарбағатай ауданындағы Жаңаауыл ауылының тұрғыны Ниязбек Садықов. Ол кісі 1925 жылы шілде айында Терісайырық деген жерде дүниеге келген екен. Қызылтастағы мектепте оқып, білім алыпты. Еңбек жолын колхозда жұмысшы болудан бастапты. 1943 жылы әскер қатарына шақырылып, Қиыр Шығыстағы Беребижан қаласы маңындағы 474 — атқыштар полкінің сапына алынады.
{jcomments on}- Біздің полк Бабства деген орыс кентінде болды. Отан шебін қорғауда үш жыл жүрдік. Оқ шығармадық. Бірақ соғыс жағдайындағы кезеңде шекара күзетінің өз қиындығы аз емес еді. 1945 жылдың 9 мамырында Жеңіс туралы қуанышты хабар бізге де жетті. Сол жылдың тамыз айында Жапония соғыс ашып, соған қатыстым. Біздің полктің бағыты Амур өзені болды. Өзеннен түнде катер арқылы өттік. Сонда бір тәулік бекініп жатып, ары қарай жылжыдық. Полк командирі подполковник Устинов Сергей, батальон командирі Штрунк деген украин азаматы еді. Жапон соғысы сол жылдың қыркүйегінде аяқталды. Сол жерде бізді бөліп, Сахалин аралына апарды. Командиріміз ауысып, бір орыс жігіті келді. Біздің негізгі міндетіміз қару-жарақтар қоймаларын күзету болды. 1946 жылы мамыр айында елге келдім,- деп әңгімелейді өзінің жауынгерлік жорық жолдары туралы Ниязбек ақсақал.
Соғыстан кейінгі халық шаруашылығын қалпына кел-тіру жұмыстары оңай болмаған. Өзгелер сияқты Ниязбек аға да колхоздың жыл он екі ай бойы жалғасатын шаруашылық жұмыстарына білек сыбана араласыпты. Ел игілігін молайтуға қосқан елеулі еңбегі үшін 1947 жылы «Еңбектегі ерлігі үшін» медалін омырауына тағыпты. Еңбексүйгіштігімен, адалдығымен танылған ағамыз қой фермасының бастығы да болыпты. Колхоз басшылары сенім артып, шаруашылық игіліктерінің, қоймасының кілтін ұстау міндетін тапсырыпты. «Қойма кілтшісі» болу жауапкершілігін 1987 жылы зейнеткерлікке шыққанға дейін мінсіз атқарыпты. Ол кісінің есімі кезінде «Қазақстан» кеңестік шаруашылығының Құрмет кітабына жазылған екен. II дәрежелі Отан соғысы орденімен», Кеңестер Одағының маршалы Г.Жуков медалімен марапатталған Ниязбек ақсақалға Астана қаласының он жылдығына арналған мерекелік медалі де беріліпті. Бәйбішесі екеуі он екі балаға өмір сыйлаған бақытты ата қазіргі уақытта Ораз деген ұлының қолында немере-шөберелерінің ортасында бақытты ғұмыр кешіп отыр.
Хамза СӘТИЕВ,
«Семей таңы»
