Шаруашылық жұмыстарының жаңа бір саласы – жылыжай орнату, егістікті тамшылатып суару әдістерін қолдану, топырақты өңдеудің тың тәжірибелерін ғылыми түрде меңгеру сияқты заман талабына сай тірліктер Тарбағатай ауданында да кеңінен қанат жая бастады. Қазірдің өзінде ауданның бірнеше ауылдарында жылыжайлар іске қосылып, тәжірибелер таратылуда. Аудан әкімі Ділдабек Оразбаевтың өзі тікелей бақылауына алып, құрылыстың сапалы орындалуы мен алғашқы бастамалардың сәтті болуына көңіл бөлуі бұл саладағы істердің тыңғылықты атқарылуына әжептәуір ықпал етті. Соның бір дәлелі — № 2 Ақсуат орта мектебінің жанынан салынған жылыжайдың қалыптасып келе жатқан жақсы жұмысы.
{jcomments on}Құрастырыла бастағалы бірер айдың жүзі болған осы жылыжайда бақша өсімдіктерінің бірнеше түрі егілген. Бұл жылыжай мұғалімдердің, өндіріс шеберлерінің басшылығымен оқушылардың тәжірибе үйренетін, өсімдіктер әлемінің сырларына терең бойлап, көзбен көріп, қолмен ұстап еңбектенетін орнына айналған. Жылыжайға жалпы басшылық жасау жұмысы Шалқар Әстаевқа жүктелген екен. Жас маман өзінің жоғары оқу орнынан алған білімі мен тәжірибесін балаларға үйретуден жалықпайтын көрінеді.
Жылыжайда қандай тірлік жасалып жатқанын көру үшін барғанымызда, Шалқар Болатбекұлы іс басында екен. Ол 8 «В» сыныбының оқушылары Жанара Байзырахманова, Жаннұр Естаянова, Жолымбет Серікқазин және Жандос Тұрсынбековпен бірге жылыжайда өсіп тұрған қызанақ, қияр, қырыққабат өсімдіктерінің жай-күйімен танысып, алдағы уақытта атқарылар міндеттер жайлы ақылдасып тұр екен.
— Бұл жылыжай аудан әкімі Ділдабек Тәжібайұлының бастамасымен тұрғызылды. Мектеп ұжымының өз күшімен құрастырылып жасалды. Мына балалар Эльвира Рахымжанова жетекшілік ететін сегізінші сыныпта оқиды. Өздері оқу үздіктері, осы жылыжайда атқарылған топырақ өңдеу, көшет отырғызу, өсімдіктердің көктеп шығу кезеңдеріндегі барлық жұмыстарға белсене қатысты. Қазір мұнда 500 түп қияр, 600 түп қызанақ гүлдеп, 30 түп қырыққабат өсіп тұр. Барлығы тамшылатып суарылады. Барлығы да осындай жылыжайларға арналған тұқымнан жеке-жеке құтыларға отырғызылып, көктеп шыққан соң, осында әкелініп егілді. Топырақты жергілікті көң, тауықтың қиы сияқты заттармен тыңайттық. Химиялық заттар пайдаланған жоқпыз. Бұйырса, енді бір айдан астам уақытта алғашқы өнім алынып, мектеп жанындағы интернат асханасына беріледі, — дейді Шалқар Болатбекұлы.
Хамза СӘТИЕВ,
«Семей таңы»
