Ежелден қалыптасқан ата кәсібімізге байланысты ат әбзелдеріне халқымыз тек еңбек құралы емес, өнер туындысы ретінде де қараған. Бабаларымыздан мұра болып жеткен бұйымдар бүгінгі күні де өз маңыздылығын жой-ған жоқ. Осындай ата жолын жалғастырып, оны кәсіп көзіне айналдырғандардың бірі — он саусағынан өнер тамған Озерки ауылының тұрғыны Ерлан Бейсекенов. Бүгінде ұлттық қолөнер, оның ішінде өрімшілік, ат әбзелдерін жасаумен айналысатын азаматтың есімі аймақ тұрғындарына біршама танымал болып үлгерген.
{jcomments on}
Қазіргі күні Ерлан Бейсекенов ерекше өнерімен ауылдастарының ықыласына бөленіп жүр. Механик мамандығы бойынша жұмыс таба алмаған ол алғашқыда түрлі салада қызмет атқарады. Жастық шағы ауылда өткен Ерлан Мұқашұлы әр іске ден қойып, алдына өнер үйренсем деген мақсат қояды. Әсіресе ұлттық қолөнер, оның ішінде өрімшілік, ат әбзелдерін жасау ерекше қызықтырыпты.
— Осыдан бес жылдай уақыт бұрын ат әбзелдерін алыс-жақын шетелдерден әкеліп, тұрғындар сұранысын қамтамасыз еттім. Байқап қарасам, ер тоқым, оған қажетті жабдықтарды өзімізге де жасап көруге болады екен. «Көз – қорқақ, қол- батыр» демекші, істі бастап көріп едік, соншалықты қиындық жоғын байқадық, тек ынта мен шыдамдылық қажет екен, — дейді кәсіпкер.
Ұлттық өнердің жанашыры осылайша ұмыт болып бара жатқан қолөнер түрі — ат әбзелдерін жасауды қолға алады. Атап айтқанда ер тоқым, қамыт-сайман, ноқта, жүген, өмілдірік, құйысқан, қамшы сынды бұйымдарды әзірлейді. Осылайша шебер жалғыз ауыл ғана емес, өңір тұрғындарының сұранысына сай еңбек етіп отыр. Өнімдеріне алғашында ауылдықтар, іргелес аудандар тұрғындарынан сұраныс түсіп, ісі біртіндеп алға басыпты.
— Рас, «Қысқа жіп күрмеуге келмейді» демекші, кәсіпкерге шаруасын дөңгелетуге қаражат қолбайлау болыпты. Алайда бұл тығырықтан шығуға мемлекеттің «Жұмыспен қамту жол картасы — 2020» бағдарламасы септігін тигізді. Өткен жылы аталмыш бағдарламаға қатысушылар қатарында «Семей қаласы әкімдігінің жұмыспен қамту орталығына» өтініш беріп, бизнес жоспарын ұсынды. Сараптамадан өткеннен кейін, қажетті қаржыны алады, — дейді Семей қаласы әкімдігінің жұмыспен қамту орталығының бас маманы Мәуліт Қилыбаев.
Шебер атанған Ерлан қолөнер бұйымдарына қажетті шикізат пен бөлшектерді Ресей, Қырғызстан, Оңтүстік Қазақстан облысынан жеткізіп отырыпты. Дегенмен соңғы жылдары қайысты шаһарымыздағы тері-былғары комбинатынан алса, ер тоқымның қосалқы бөлшектерін өз қолдарынан жасайтын болыпты.
Бүгінде жерлесіміздің қолынан шыққан бұйымдар республикалық, облыстық, аудандық көрмелерге қойылып, арнайы жүлделерді де иеленген. Қазіргі күні кәсіпкерге облыс және республикалық деңгейдегі бәйгелерге қатысатын сәйгүліктер үшін қажетті ат әбзелдеріне, терлікке (аттың терін алатын жабу) арнайы сұраныс түсіп тұрады. Соңғы кездері ғаламтор арқылы да тапсырыс бергендер саны артып, Астана, Қарағанды, Павлодар қалаларына да қолөнер туындыларын жіберуде. Ал негізгі өнімдері Семейде саудаланады.
«Ісім өнсін десең, ретін тап!» деген хакім Абайдың кәсіпкерлікті жолға қойғысы келген жандарға арнап айтқан сөзі осындайда ойға оралады екен.
А. САМАТҰЛЫ, «Семей таңы»
