Соңғы жылдары саяжайларға электр жарығын таратуда біраз қиындықтар туындап, тұрғындар тарапынан келіспеушіліктер орын алуда. Осы мәселе өткен аптаның бейсенбісінде БАҚ өкілдерімен өткен баспасөз мәслихатында сөз болды. Саяжай массивтерін электрмен қамтамасыз ету мәселесі бойынша Семей қаласының тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы Александр Генрих, “Шығысэнерготрейд” ЖШС Семей өңірінің директоры Светлана Винтер, “ШҚ АЭК” АҚ Семей аймағының бастығы Бауыржан Смағұлов, “МЭПС” ЖШС бастығының орынбасары Болат Жұмаділов БАҚ өкілдері сауалдарына жауап берді.
{jcomments on}Саяжай массивтерін электр жарығымен қамтамасыз етуде көптеген мәселелер туындап отыр. Ондағы желілер әркімнің жекеменшігінде болғандықтан, қуат көзіне төленетін төлемақы да тұрғындар үшін әртүрлі. Осындай саяжай алқаптарының бірі — Шығыс кентіндегі оң жақ жағалау саяжай алқабы. Бұл аумақтағы желілер жергілікті кооператив балансында. Сондықтан да меншік иелері барлық ішкі жұмыстарды, атап айтқанда желілерді жөндеу мен қордаланған берешектерді, өздері ретке келтірулері керек. Ал тұрғындар саяжайды толықтай «ШҚ АЭК» АҚ қарамағына алуды өтініп отыр. Дегенмен ол үшін саяжайдағы барлық желілер техникалық талаптарға сай болуы керек екен. Сонда ғана электр таратушы компания оларды өз балансына ала алады. Қалалық ТҮКШ бөлімінің басшысы Александр Генрихтің айтуынша, осы бағытта қазір жұмыстар атқарылып жатыр.
— Жергілікті кооператив иелігіндегі желілерді мемлекетке өткізу үшін алдымен оларды иесіз деп тануы керек. Ол үшін тұрғындардың жүз пайыз келісімі керек. Ал иесіз атанған күннің өзінде, ол бір жылдай есепке алынады. Одан кейін сот процестері басталады. Міне, осыдан соң ғана тозығы жеткен желіге мемлекет қаражат сала алады. Бұдан кейін энергия таратушы компанияға тапсырылады. Иә, бұл процесс тұрғындар үшін тым ұзаққа созылады. Жоқ дегенде 2-3 жыл уақытты қажет етеді, — деген Александр Генрих тағы бір мәселе, егер кооператив таратылатын болса, саяжай тұрғындары мүлде жарықсыз қалуы мүмкін екенін, өйткені электр таратушы компаниямен келісім-ге келетін ешкім болмай қалатынын, сол себепті тұрғындарға түсіндіру жұмыстары жүргізіліп жатқанын атап өтті.
— Дұрыс шешім қабылдау керекігін айтып түсіндірудеміз. Қазір жарық үздіксіз беріліп отыр. Жақында олар бір трансформатор қойды, қазір екіншісіне қаражат жинады. Түскен салмақты өз күштерімен реттеп отыр, — дейді Александр Генрих.
Айта кетуіміз керек, жалпы, қалада 200-ден астам еш жерде тіркелмеген, яғни иесіз жатқан электр желілері бар екен. Алайда жергілікті атқарушы билік оларды әкімшілік балансына алып, қазір оның 17-сін сот арқылы иесіз деп таныған. Сондай-ақ олардың он шақтысына қалпына келтіру мақсатында жоба да жасалыпты. Алдағы уақытта аталмыш желілердің барлығы қалпына келтірілетін болады.
Асан САМАТҰЛЫ, «Семей таңы»
